Bisan pa nga gibalita na nga gi-abolish na ni PNoy ang pork barrel (PDAF or Priority Development Assistance Fund), daghan gihapon ang nangyamiid sa maong balita.
Daghan gihapon ang nagtuo nga ang pork barrel magpabilin apan hatagan ra kini og laing pangan. Makalusot kuno gihapon.
* * *
Dili na ba gyud katuohan sa katawhan ang gobyerno?
Tingali motuo ang katawhan kalabot sa aksyon nga gisaad ni PNoy batok sa pork barrel scam kun ang mga nalambigit niini silotan.
Pahamtangan gyud og tinuoray nga silot dili kay sa laway lang.
* * *
Matud pa ni Philippine STAR columnist Marichu A. Villanueva: “Go after people who give pork barrel a bad name.â€
Bitaw. Kadtong mga tawo sud ug gawas sa gobyerno nga mihatag og mangil-ad nga ngalan sa pork barrel kang kansang katuyuan maayo man unta, angay gayud nga silotan. Ug silot nga dili lang labtik lang sa tudlo kundili patiran gyud.
* * *
Nakita nato sa tv ang kapin sa milyon ka mga tawo nga mipakita sa ilang kasuko bahin sa pork barrel scam.
Kun dili kini hatagan og pagtagad ni PNoy mora lang nga iyang nalimtan ang ingon sab ka daghan sa mga mipakita sa ilang kayugot sa diktadorya ni Marcos.
* * *
Daghan kitang mga higala nga gikan sa relihiyosong sektor nga nangapil sa Million People Rally adtong Lunes.
Walay nisugo kanila sa pag-apil sa rally. Sama sad sa uban nga nangadto sa rally kay sugo sa ilang konsensya. Angay silang pahalipayan.
* * *
TRIVIA. Salamat sa atong mga higala diha sa Mambaling, Alumnus ug Cabreros sa nagpadayon ninyong suporta sa Banat News. God bless.