Wa lang gyud intawon damha sa buhok nga siya ang mahimong sentro sa kalibog sa mga Sugbuanon sa niaging semana. Tungod sa panginahanglan pagkontrolar sa pagkatap sa makahilong lana nga gibugwak sa nalunod nga MV St. Thomas Aquinas 1 ngadto sa kadagatan sa Cordova ug Opon ug kay mao ni labing unang higayon nga nahiagom ang Sugbo og ingon ini kalapad nga oil spill, nag-iyahay ang lokal nga mga opisyal pagpangita og sulbad.
Ug ang buhok maoy napahimungtan. Human gipasidunggan nga labing epektibo pagsuyop sa oil spill sa Guimaras ug ubang bahin sa kalibotan karon gikuwestiyon nang buhok makatabang o makapasamot ba lang hinunon sa kahugaw sa dagat.
* * *
Nagsugod ang kalibog dihang nikalit lang og pakita ang nagpaila nga mga eksperto nga nitunglo sa buhok nga makadugang lang sa hulga batok sa mga isda ug ubang kinabuhi sa dagat nga naapiki nang daan sa nikatap nga lana.
Sa way pagsubay sa tinuoray’ng sukaranan sa ilang pasidaan ni sa ilang katakos pagsusi sa tinuoray’ng kapuslanan sa buhok gimaldisyon dayon sa pipila ka sakop sa media ug mga opisyal sa gobyerno nga dakong binuang kay way kapuslanan ang nakabuylo nang kampanya pagtigom og dugang buhok. Labihang sibawa sa pagtunglo sa buhok nga pipila nahadlok nang mohikap kay tingali og mahilo sa ilang buhok.
* * *
Unang angay’ng klaruhon mao nga ang nilili sa Sugbo sa niaging semana mga eksperto sa pagpalambo sa mga bakhaw. Wa sila mangangkon nga mga eksperto sa buhok. Ikaduhang angay’ng klaruhon mao nga wa nila kuwestiyona ang katakos sa buhok pagsuyop sa lana sa dagat, igo lang nipadayag og kabalaka nga ang buhok mahimong mounlod ug makapasamot sa kahugaw sa dagat. Ikatulong angay’ng klaruhon mao nga wa sila moingon nga ang buhok makahilo sa mga isda ug ubang kinabuhi sa dagat. Naghisgot sila og keratin nga, samtang tinuod naa sa buhok, naa sab sa ngipon ug panit sa mga isda ug sa hapit tanang hayop.
* * *
Ikaupat nga angay’ng klaruhon mao nga ang gikahadlokan sa mga eksperto mao ang artipisyal nga keratin nga gibutang sa beauty parlors sa mga buhok nga gipa-plantsa. Ikalimang angay’ng klaruhon mao nga mayoriya sa mga buhok wa katilaw og artipisyal nga keratin, bisan ang mga nagpa-plantsa wa mameligrong mahilo sa ilang buhok. Ikaunom nga angay’ng klaruhon mao nga ang buhok sama ka-organic sa bunot, mahimong mas taas og lahutay apan madugta sama sa ubang bahin sa kinabuhi--sa abog gikan, sa abog pauli--busa di kapasanginlang makahulga sa kinabuhi sa dagat hangtod sa hangtod. Ug kataposang angay’ng klaruhon mao nga ang buhok nga nakasuyop na og lana sama sa bunot nga nakasuyop na og lana di mahitabong kan-on sa isda ug managsama silang luwas nga mahipos.
* * *
Email: leo_lastimosa@abs-cbn.com