Obstruction

Usa ka drayber og PUJ nasundan nako sa Gorordo Avenue dapit sa Lahug Elementary School ug nagdagan kini nga hinay kaayo paingon sa direksyon sa JY Square.

Maguwang lang og gamay sa maglakaw ang gikusgon sa iyang pagdagan. Maayo unta kadto og nagpadaplin, diha siya miagi sa “lane” nga dapit sa center line.

Sa taud-taud nako nga pagsunod-sunod sa maong drayber, akong giserbatohan, apan wala g’yud makasabot ang luko nga drayber nga sayop ang iyang gihimo.

Ang mga sakyanan diri na lang gud mi-overtake sa “right lane” apil na ko. Pagtungod nako sa maong drayber akong gimandoan nga mopadaplin ug didto akong gidisiplina.

Porbida ‘sab tawon mo uy, ang pagpadagan ra g’yud sa sakyanan maoy inyong kamaohan? Ang gihimo sa maong drayber naka-obstruct sa pag-agi sa ubang mga sakyanan.

Walay magbuot kaniya kun hinay ang iyang pagpadagan pero adto siya sa daplin moagi, dili kay magpatunga.

* * *

Kini bitaw’ng mga construction workers gagmay ra kaayo og sweldo apan hilabihan ka peligro ang ilang sitwasyon.

Gikan sa akong opisina makita ang nagpadayong construction sa Marco Polo Residences. Kana g’yud nga mag-alsa na og bandol sa mga kabilya ang tower crane unya motuyok aron adto ibutang sa dapit nga gamiton ang kabilya, mokitbi ang atay nga magtan-aw.

Pastilan kun simbako maputol ang kable kay bug-at gud kaayo na’ng kabilya unya adto mapunta sa ubos nga tua ang mga construction workers, pwerteng pataya.

Hinoon, tingali lig-on g’yud na ang gigamit nila nga kable nga dili maputol. Kun magtan-aw ko sa mga construction worker malooy ko kay nasayud ko nga gagmay kaayo na sila’g sweldo.

* * *

Nakadawat ko’g report gikan ni Bords Marlon Lopez, usa sa mga tigpaminaw sa DYLA, nga dunay mga taxi drivers nga anha maglinya sa Parkmall unya dili mogamit og metro.

Ang maayo ani Bords Marlon ireklamo sa LTO kining maong mga drayber. Kun ako ang makasakop ani nila, makapanglingo-lingo g’yud kining maong mga drayber.

* * *

Paniid nako, midaghan na ang mga sakyanan nga ang plate numbers gitaptapan og itum nga bildo. Akong balikon nga dili kana maayo og ang mga drayber sa sakyanan nga gitaptapan ang plate number og itum, mahimong makamulta.

Kun ako ang makasakop niana nga mga drayber dili g’yud ko mopasaylo. Diha ko’y nakit-an nga itum ang pintal sa sakyanan ug ang plate number sa’b pwerteng ituma nga dili mabasa.

Sigi lang kay moabut ra ang panahon niining maong mga drayber nga madakpan.