Gikan sa atong pagkatawo, gimatuto o giumol na kita sa usa ka pagbati nga gitawag og gugma. Hiyas kini nga hatag sa kahitas-an, nga ang unang katuyoan niini mao nga labaw ni bisan kinsa, ilhon ang Dios sa tim-os nga gugma pinaagi sa pagsunod sa Iyang kabubot-on. Gusto usab sa Dios, ampingan ug higugmaon ang kaugalingon ingon man usab ngadto sa isig ka tawo aron kita magmalipayon.
Apan adunay mga sitwasyon nga lisod masabot o matukib sa atong yanong salabutan. Sama ning atong temang tukion, unta kakuhaan kini’g pagtulon-an sa kinabuhi. Mahitungod kini sa gugma sa babayeng bata pa nataptan sa sakit nga dili na makakita. Karon usa na ka matahom nga dalagang buta. Tungod kay sapian ang mga ginikanan, way hunong ning gipadoktor basin nga makakita pa.
Bisan sa iyang kahimtang nga buta, malipayon na niya kining gidawat kay labaw pa niyang nabatyagan ang kisaw sa palibot, labaw pa niadtong may mata nga makakita pa. Apan dihang gitugkan kini sa kagaw sa gugma, naka-uyab og usa ka guwapo nga matinud-anon usab nga nahigugma kaniya. Sukad niadto, subsob nag-ampo nga iyang Makita ang lalake nga buot niyang unongan sa kinabuhi.
Tuod man, dili matukib ang kalipay sa buta nga dalaga, dihang gipahibalo sa doctor nga may midonar og mga mata aron siya makakita na. Karon hingpit nang naangkon ang iyang gipangandoy, nagsayaw-sayaw sa tumang kalipay. Dihang buot na unta kini mogawas sa ospital, haskang nakapanghimaraot sa usa ka guwapong lalake nga usa usab ka buta, nga nakababag ug nakasamok sa iyang panan-aw.
Hilabihan ang pagmahay sa ulitawong buta, kay wa siya magdahom nga ingon niadto ang dangatan nga nabutaan tungod sa gugma. Nga gisakripisyo ang kaugalingon alang sa hinigugmang buta. Karon ulahi na niya naamgohan ang pagbasol. Ang gugma nga nawad-an sa katam-is, tungod kay puy-an na niya ang kinabuhi nga mag-antos sa kasakit, nga magduhiraw sa kangiob sa kinabuhi.
Hangtod usa ka higayon niana, nahinganghang nakonsensya ang babayeng nagsud-ong sa lalake. Ingon sa wa siya’y utang kabubut-on human masayod nga mao diay ang tag-iya sa iyang mga mata. Nga karon iya nang nakita nga nakahaya na, apan ang mga mata niini anaa kaniya nga makakita pa, aron padayon siyang tulisokon sa tanlag tungod sa wa pagtuman sa iyang panaad.