Ang mga hunahuna nga gipadayag dinhi iya ra sa tagsulat ug walay labot ang Banat News ug mga sakop niini.
Gikan sa trabaho, mihapit si Boy Abella, Assistant Chief Security Officer, sa Pasil aron mangompra’g isda. Nakurat siya sa presyo human ibungat sa tindera kun tagpila ang Suno (kinamahalang kamatang sa isdang lapulapu).
“Tag P120 ra ni, Nang?†Usab niyang sukna.
Daw dili siya makatuo sa presyo. Kay sa mga supermart, tag P500 kapin ang kilo niini. May higayon nga moabot pa kini’g tag P600 ngadto sa P700 kun magnihit.
Gisil-ing sil-ing ni Boy ang lawas sa isda. Pula kaayo ang bulok sa lawas niini. Lab-as kaayo sa iyang panan-aw. Sa walay daghang langas, mipili dayon siya’g lima ka dagko. Wa na lang siya mohangyo. Kay sobra ra lagi kabarato!
Pag-abot sa ila, nagpatula dayon siya og usa ka buok niini sa iyang asawa. Apan naunsa ba, nga sa paghaon na, napuro pula man ang bulok sa sabaw? Haskang gubaa sa nawong ni Boy pagkatimaho niya sa inalisngaw nga nanuhotsuhot sa iyang ilong dihang gihulad na ang giluto sa dakong panaksan.
Dili man humot sa tinola ang iyang nasingo? Daw baho man sa agup-op. Haskang hayblara ni Boy. Tiaw bay, ang orihinal nga kolor sa isda nausab? Dili na pula. Tungod kay ang tanang bulok pula anaa na man balhin sa sabaw-- nangatangtang gikan sa lawas.
Didto pa masayod si Boy nga itom diay ang kolor sa maong isda ug binutangan la’g diyobos aron mapula pag-ayo ang hitsura sa tibuok lawas. Aw, wa gyud kini makaon. Nalabay tanan sa pasawan. Ang kagutom nga gibati ni Boy kalit lang gisapawan sa labihang kalagot.
“Mao diay’ng barato ra ang isda sa Pasil.†Puwerte niyang bagulbol, uy! Wa siya magtuo, nga ang usa ka Chief Security Officer sama niya, ilaron lang sa guwatsinanggang tindera.