Ang reyalidad sa kinabuhi angay natong dawaton nga ang tawo bisan unsa kadaghan nga maangkon niya sa kinabuhi, magpabilin gihapon nga haw-ang o walay katagbawan. Usahay bation kita’g kasina niadtong dato na ang kahimtang apan nisamot hinuon ang pagkadato. Ug kadtong pobre nahimo sad nga labi pa hinoon nga na pobre. Unsa man diay ang gihimo sa dato nga wa himoa sa pobre?
Dili baya tanang dato nga dato na daan, gawas lang niadtong may kabilin sa pagkadato gikan sa ilang ginikanan. Apan dili kini garantiya kay may anak sa dato nga nahimo sad nga labaw pas pobre ang iyang kahimtang. Nakabentaha ang pobre daan kay naanad na, samtang ang na pobreng dato mora’g hingpit nga nawad-an sa paglaom nga makabangon pa. Ang pobre may paglaom pa madato.
Kitang tanang tawo gibuhat sa Dios nga patas. Unsa may namat-an tang kahimtang ning kinabuhia, pulos kita gihatagan og mga oportunidad nga moasenso ubos sa kondisyon nga modiskarte ta sa atong panlimbasog nga moasenso sa kinabuhi. Kun ang dato nisamot man ang kadato, kana tungod kay aduna sila’y plano nga di mokompyansa nga permi gyud nga magsinikaysikay.
Bisa’g duna nay nakapundo nga dakong kuwarta, di ni mosugot nga di kini mapun-an kay hadlok mokibra ang kita. Mangita laing paagi nga makakuwarta pa. Bisan ang magtiayon wa magsalig nga mag-inusara sa kinitaan nila sa trabaho. Kinahanglan maniid og unsay mga oportunidad nga mokita pa gawas sa naandang trabaho. Kun abtik ka lang, nay daghan niini sa imong palibot.
Makighimamat sa imong kahigalaan kun unsa may kalihokan karon sa mga panguwarta nga gituhoan mong makadugang sa kita mo. Di usikan ang oras nga wa kay mahimo human sa trabaho. Magmatngon ka lang nga mabiktima sa mga mapahimuslanon nga buot ka sab nga panguwartahon o ilaron. Ayaw ihurot ang pagsalig kinahanglan maniguro ka nga molambo gayud sa pagsikaysikay mo.
Aron ka moasenso, ayla’g kalimot nga sinsero ka sa isig katawo, may prinsipyo sa katarong, kugi, kinaiyang makiangayon ug Diosnon. Kun mayo ang imong relasyon sa panguwarta, makahimo ka’g negosyo nga way puhonan kun di ang imo lang maayong kredibilidad nga di kamaong mohatag mga atraso ni bisan kinsa. Mahadlokon sa ganansyang makagaba. Mohatag ka sab og oportunidad sa uban nga mahimo mong katabang aron mas modako pang kita mo sa pagsinikaysikay.