Pagbanhaw sa Butuanon River

Salvacion, Maguikay, Mandaue City--Nahawan nang tampi sa suba sa Butuanon dinhi human boluntaryong nigguba sa ilang kabalayan ang kapin sa 60 ka pamilya unom ka buwan ang nilabay. Nahawan na sab ang pikas tampi nga nahimutang sa San Vicente, Tabok kay niuyon sab ang 47 ka pamilya nga mobalhin sa mas luwas nga mga dapit. Pipila nila napahimutang na sa relocation site nga gitikad ni Mayor Jonas Cortes sa Paknaan.

Di luwas ning dapita. Molapas sa tawo ang suba kun mas kusog kay sa naandan ang bunok sa uwan sa bukid ug patag labi na kun madungan sab sa taob sa dagat. Maong wa mosupak ang kasagaran sa mga molupyo dihang gipabalhin sila.

***

Gawas lang sa pipila nga nisalikway sa gitanyag nga luna sa Paknaan alang nila. Wa sila madani sa financial assistance nga ihatag lang kun aktuwal na silang mamalhin. Mga opisyal sa barangay maoy gimandoan sa paghawan sa mga tampi sa suba. Padayon silang nangumbinser sa mga molupyo samtang nagpaabot nga mangisog na si Mayor Cortes ug modangop sa pinugsanay nga demolisyon.

Masaaron hinuon ang gipasundayag nga pagpakabana sa mga opisyal sa mga barangay sa pagpanlimpiyo sa suba. Hinaot nga molahutay ang ilang kakugi. Ug hinaot nga moapil nang kinabag-an sa mga molupyo paglimpiyo ug pagtabang pagbadlong sa bag-ong maghugawhugaw.

***

Di sayon ang tahas pagbanhaw sa suba sa Butuanon. Nga may gitas-on nga 30.5 ka kilometro. Nagsugod sa bukirang barangay sa Malubog sa Dakbayan sa Sugbo ug natapos sa kabaybayonan sa Umapad sa Dakbayan sa Mandaue. 11 ka barangay sa Dakbayan sa Sugbo ug 10 ka barangay sa Dakbayan sa Mandaue ang gilatasan sa suba, maoy nag-unang mga tinubdan sa basura nga nakahulga ug mao say gilaoman nga magtinabangay sa pagpahibalik sa naandang kalimpiyo ug katahom sa Butuanon.

Daghang salamat sa liderato sa Department of Environment and Natural Resources ug sa tabang sa lokal nga mga opisyal ug sa pribadong sektor nakasugod nang pagbanhaw sa Butuanon. Hinaot nga madani ang mas daghan pa pagdason pinaagi sa paglimpiyo sa ilang kaugalingong nataran.

***

Nipahibawo silang Kapitan Francis Tan sa Maguikay ug Kapitan Felix Suico Jr. sa Tabok nga gipatun-an ni Mayor Cortes ang paghimo sa tampi sa Butuanon nga suroyanan sa mga molupyo ug sa lokal ug langyaw’ng mga turista. Lisod hinuon ang paghimo og cruise sama sa suba sa Loboc, Bohol kay gawas nga mabaw mohubas gyong pipila ka bahin sa suba kun ting-init.

Nisugyot ang mga molupyo nga sementuhon ang mga pangpang sa tampi sa Butuanon aron kapugngan nang pagdahili sa yuta. Nga maoy plano ni kanhi gobernador Tingting Dela Serna sa siya pay mayor sa Mandaue. Apan mapatuman lang kun tabangan sa nasudnong gobyerno.

***

Email: [email protected]