AGOSTO 4, 2013: Ikanapulo’g walo nga Domingo sulod sa tuig
Domingo ni San Juan Maria Vianney-Patron sa mga Pari
Mga Pagbasa: Eccl. 1;2;2;21-23/Sal. 90/Col. 3;1-5,9-11/Lk. 12;13-21
Ang tanan buot mamahimong adunahan mao nga tigom taman sa ginhawa ang ilang gihimo. Palit og daghang mga kayutaan, pundo ug daghang kwarta sa bangko, pa enroll sa tanang mga insurances ug uban pang mga agni sa gitawag nilang seguridad. Ang kinabuhing yano nahimong komplikado gumikan sa mga termino nga nahimugso sa komersyalismo ug konsumerismo. Apan matud pa ang bugtong seguro sa tanan mao gyud ang kamatayon. Wala kita masayud kun kanus-a kita mamatay apan tino gyud nga kita mangamatay gayud. Si Jesu-Kristo nagtudlo kanato nga dili maayo nga atong isalig ang kinatibuk-an sa atong kaugalingon ngadto sa bisan unsang lumalabay kay bisan gani ang atong bahandi dili man makapugong sa ato mismong kamatayon.
Ang konkretong sanglitanan sa tawo nga kabus man tuod sa sumbanang kalibutanon apan dato atubangan sa Dios mao si San Juan Maria Vianney ang balaanong kura sa Ars France.
Bugtong patatas ug tubig ang kalan-on matag adlaw ug gigahin niya ang tibuok niyang kinabuhi sa pagkapari diha sa pagkompisal ug pag-alagad sa iyang mga parokyano. Sa iyang kayano siya nahimong ambongan atubangan sa Dios ug sa mga tawo gumikan sa iyang mga birtud. Wala man tuod siya’y natigom nga mga butang apan nahimo siyang dato gumikan sa iyang nahatag.
Kay kun maghisgot kita og productivity dili ni siya acquiring kondili giving. Dili lang sa bisan unsang butang materyal kondili mismo sa atong kaugalingong kinabuhi. Mao nga himoon natong magmabungahon ang atong kinabuhi. Hinumdomi: “Simplicity is beauty.â€