Effigy

Kada rali protesta sa mga militanteng pundok didto sa kaulohan, duna gyuy mga effigy sa pangulo nga giprotestahan diin kini sunogon sa tunga-tunga na sa rali.

Suma sa usa ka taghimo niining effigy tag P300 ngadto sa P500 ang matag-usa niining effigy. Barato ra kuno kini kaniadto -- P150 ngadto sa 200 ra.

* * *

Matud pa sa atong tinubdan dili ang tanan nga effigy nga gihimo alang sa usa ka rali sunogon. Naay usa o duha nga dili masunog ug kini ilisdan og nawong alang sa kun kinsa man kadto ang mosunod nga pangulong ralihan.

Matud pa nga naay mopalit sa effigy nga wa sunoga sa mga raliyista. Ila kining koleksyonon para kuno souvenir sa mga rehimen nga giprotestahan.

* * *

Naa kunoy taga Caloocan nga dunay effigy ni kanhi Presidente Fidel Ramos, kanhi Pres. Gloria Macapagal Arroyo, kanhi Pres. Erap Estrada, Pres. Noynoy Aquino.

Mao ra kuno kini ang wala masunog nga mga effigy sa presidente atol sa rali batok sa ilang matag administrasyon.

* * *

Uso ang pagsunog sa effigy sa mga lider nga wala higustuhi sa mga militanteng pundok dili lang dinhi sa Pilipinas kun dili usab sa ubang kanasuran sa Asya.

* * *

TRIVIA. Maayong adlaw sa atong mga higala diha sa Mandaue City Hall ug sa mga amigo tang taxi ug PUJ driver. Daghang salamat sa nagpadayon ninyong suporta sa Banat News.

* * *

NOTE: Ang atong report bahin sa effigy gikutlo sa tampong artikulo ni Danny Impuerto, taga Lapulapu City. Salamat Sir Danny.