EDITORYAL - Ang sesyon nga may salmot sa publiko

Usa ka maayong laraw ang  nahunahunaan  ni Vice Mayor Edgar Labella ang paghatag  sa publiko  nga  higayon nga makatampo  sa maayong  hunahuna sa  panahon  sa iyang sesyon.

Bisan tuod  og  di  kini pinili  sa katawhan apan usa ka maayong  higayon  alang niadtong  may  mga  sugyot  nga  ikaayo  sa  ilang  barangay  nga  ikapalanog atol  sa sesyon  sa konseho  aron  kahatagan  dayon  og  action.

Tungod kay daghang  concern ang taga  barangay  nga di na  masayran  sa  ilang  kapitan  o  konsehal tungod sa  ka-busy  ning  mga  tawhana.

Ikaduha  tungod  kay ang  mga opisyal  sa barangay  usahay  di  na  makatagad  sa mga suliran  sa kaugalingon  nilang  lugar, wa nay kapahungawan ang publiko  ug  mas  maayo  nga adunay  konseho  sa siyudad  nga  naghunahuna sa  paghatag  kanila og  katungod aron mosalmot  pinaagi  sa pagpalanog  sa ilang mga  problema.

Usa  kini  ka  bag-ong  butang  alang  sa konseho  nga modawat  og  mga  sugyot  gikan  sa publiko.

Apan  kinahanglang  may piyalan  niini  ang bise  mayor  nga  maoy moutingkay  sa maong  mga  sugyot  aron pagpili  sa  mga konsehal  sa  mga angay  ug  di angayang hatagan  og  pagtagad.

Kay  ang konseho  usa  ka sagradong  lugar  ilabi  na  sa panahon  nga  magtigom  ug  mag-sesyon  ang  mga  konsehal  nga  maoy  usa  sa labing  dako  nilang katungdanan.

Busa  di angay  nga  bugal-bugalan  sa katawhan  ang sesyon  kundi  ang  mga  importanteng butang  nga ikaayo  sa tanan maoy angay  ug  takus  nga  hatagan  og  gibug-aton  sa  mga  konsehal.

Kun  kini  nahunahunaan  man  sa  bise  mayor,  maoy labing  maayo  nga may partisipasyon  ang  publiko  sa pagladlad  sa  mga  problema  nga  may  labot  sa sosyidad  ug  sa katilingban.

Problema  sa ilang  lugar  nga  nagkinahanglan  nga kahatagan  dayon  og  tukmang lakang, sama  sa sistema  sa drainage, basura, gidiling  drugas,  gidiling  sugal, infrastructure, ug  uban pa.

Kini  aron  nga ang  mga  konsehal  makahimo  dayon  og  dinaliang  solusyon  kun  gikinahanglan.

Kasagarang  mga  suliran  ning  dakbayan  naggikan  sa barangay  nga  nagsakop  sa  mga sitio.

Busa  anaa  sa  mga molupyo  sa  usa  ka sitio  kinsa  nakakita  og  problema  nga  dugay  na  nga wa  matagad  sa ilang  mga  opisyal  sa barangay. Pinaagi  sa pagpaabot  niini  ngadto  sa konseho, makatabang  siya  alang  sa kahapsay  sa pagpuyo  ug  panginabuhi  sa katawhan  sa iyang lugar.