EDITORIAL - Ang pagsalikway sa karaang sakyanan

Una sa tanan asa  mang dapita  sa sakyanan  ang gikinahanglan  nga  bag-o?  Sa  iyang  makina o kaha. Kini may  labot  sa plano  sa LTFRB  nga  papason  na  ang mga  sakyanan nga  nag-edad  og 15 anyos  pataas.

Ang kaha o  lawas  sa sakyanan  dali  ra  nga  buhaton sa  mga panday nga maayo  mokopya  og  desinyo.

May  mga  panday  sa  kaha  sa sakyanan  nga  master  na kaayo.

Apan tungod  kay wa  magmandar og  usa  ka desinyo  sa kaha sa PUJ  ang LTFRB, hinungdan  nga pagusto  lang  ang mga  operator. Sama  ra  usab  sa  mga taxi  nga  nag-agad  sa kompaniya  nga  may  kaugalingong  desinyo  sa matag modelo  niini. Dinhi  sa Cebu kun  ang usa  ka operator, wa usay  kaugalingong  desinyo  sa iyang  PUJ, aw kutob  sa mapalit  niyang  PUJ,  mahimong  as is,  nga gikan  sa unang  tag-iya  niini  mao  ra  gihapon  hangtud  nga angay  na  nga itapok  tungod  sa iyang  pagkagubaon  na. Busa  kun  ang usa  ka  operator  igo  lang mamalit  og  second  hand  nga PUJ, unya  padaganon  dayon  tungod  kay  wa siya’y  kaugalingong  desinyo, aw  natural  maglainlain  ang desinyo  niini  nga  ang  bugtong  masayud  mao  ra  ang  LTFRB  o  kaha  LTO  sa  iyang  mga  sakyanan.

Apan  kun ang  usa ka operator  may pagkadelikado  motan-aw  og  desinyo,  aw  may  kaugalingon  kining  estelo  sa  matang  sa  makina  ug  kaha  sa  iyang  sakyanan  nga PUJ  nga matawag  nga iyang  kaugalingong  identity.

Nga kutob  sa makakita  sa PUJ  nga  may usa  ka design  ug pintal  sayon  ra  nga ilahon  sa  publiko  ang  operator  niini.

Samtang  sa laing bahin kun  makina ang gikinahanglan  nga  bag-ohon, aw lisud  kaayo.

Kasagaran  sa  mga  PUJ  karon  mga  surplus  o  ginamit  na  nga mga  makina  nga  gikan  sa Japan  o  Korea. Diin  ang  uban  nag-ungot  pa  sa kaha  sa bisan unsang matanga  sa sakyanan.  Mapasaheroan  man  o  kaha  private  service  ra  nga gikan  sa gawas. Pag-abot  dinhi  gipiyesa-piyesa  na  sa  mga  suplasan, dayon  lainon  ang makina .

Ingon  usab  niini  ang  uban pa  nga  mga piyesa  niini busa  karon  mas  maayo  tingale  nga  ibungat  sa LTFRB  ang  buot  nilang ipasabot  sa bag-o.

May  mga kaha  karon sa PUJ  nga  tagkapin na  sa 30 ka tuig  apan  tungod  kay  kanunay  nga gilimpiyohan ug  gipintalan,  aw mura  lang  og  lima  lang  gihapon  ka  tuig.

Samtang  may kaha  sa PUJ  nga lima pa  ka tuig, apan  mura  na  og  50 ka tuig  ang gidugayon  tungod  sa katamhangan  sa tag-iya. Busa  unsa  may  gusto  sa LTFRB, bag-ohon  ang tanang kaha  ug  makina  ug  lakip  usab  ang desinyo  sa PUJ?