Unsaon pag-usab sa apelyido sa bata nga illegitimate?

Adunay ubang illegitimate nga bata nga ang ilang nailhan nga amahan mao ang bana nga gikaipon sa ilang inahan. Kini tungod usab sa gugma nga gipakita sa bana ngadto sa anak sa iyang asawa nga diin iya kining gipakasama nga iyang kaugalingong anak. Apan ang dakong pangutana kun ang apelyido sa bata nga illegitimate mamahimo bang isunod sa iyang apelyido kay iya na man kining giisip nga anak? Kana nga pangutana ang atong tubagon karon sa atong column.

Dear Atty. Divine

Good day. Akong nabasa sa Banat News nga pwede ra magpadala og suwat pinaagi sa email. Ako si Leonor, 30 years old, married ug taga Cebu City. Atty. Naa koy duha ka anak. Ang akong bana karon dili ni siya maoy amahan sa akong eldest. Magpatabang unta ko kay gusto unta ko ma-change ang apelyido sa ako eldest kay maluoy ko sa akong anak sige pangutana nganong lahi man siya apelyido namo. Wala man gud nako siya sultii sa tinuod. Ang akong bana maoy iyang nailhang amahan. Wala’y problema ang akong bana nga isunod sa iya ang apelyido sa akong eldest but wa mi igong kuwarta alang sa pagpausab sa iyang apelyido unsa may maayo nako nga buhaton?

Daghang salamat sa imo oras sa pagbasa sa ako suwat.

— Leonor

Dear Leonor,

Ang imong pangutana, susama sab sa pangutana sa uban kun mamahimo bang isunod ang apelyido sa ilang illegitimate nga anak ngadto sa apelyido sa ilang bana nga maoy nailhan nga amahan sa ilang anak. Ang atong balaod nagtugot niini apan pinaagi sa legal ug kana mao ang adoption. Dili mamahimong i-short cut nato ang balaod kay mosangit kamo sa Local Civil Registrar kun inyong ipausab deretso ang apelyido sa imong eldest ug isunod sa apelyido sa imong bana nga dili maoy matuod niyang amahan. Ang Local Civil Registrar adunay daghang rekisitos nga pangayuon alang sa pagpausab sa apelyido sa bata ug usa na niana mao ang kamatuoran nga iya kining matuod nga anak. Aron paglikay sa problema mas maayo nga inyong ipaagi sa adoption kay sa higayon nga mauyunan sa Korte ang adoption, momando ang Court mismo sa Local Civil Registrar ug sa NSO nga ipausab na ang apelyido sa bata ug isunod sa apelyido sa nagsagop kaniya ug mamahimo na sab nga legitimate ang status sa imong anak ilabi na kun kamong duha sa imong bana ang mosagop sa bata. Kun wa moy kwarta nga ikagasto alang sa adoption process mamahimo nga modangop kamo sa Public Attorney’s Office kon PAO kay motabang man kini sila sa legal nga mga problema sa mga tawong way ikagasto og abogado.

Hinaut nga akong natubag ang imong pangutana. Daghang salamat ug God Bless.

— Atty. Divine

* * *

 Alang sa inyong pangutana, ipadala lang ang inyong suwat sa Legal Corner sa Banat News sa V. Gullas Street, Cebu City or email sa [email protected]. ug akong tubagon ang inyong pangutana matag adlaw’ng Miyerkules ug Domingo pinaagi sa akong column.