CITOM igmata ang mata

Kini bitaw nga mga drayber sa trak nga maghakut og mga lapok gikan sa mga construction site angay kini nga dakpon kun makita nga magpangatagak sa karsada ang lapok nga ilang gidala o bisan ang mga lapok nga namilit sa ilang ligid.

Kamo nga mga traffic enforcers nga nadistino diha sa karsada abtika ang inyong mga mata kun makakita kamo niining mga trak nga magkarga og lapok nga magpangatagak diha sa karsada. Unya kamo nga mga foreman sa construction company gamita ang inyong utok.

Nasundan nako ang nagpangatagak nga lapok, basa pa kaayo gikan sa Gorordo Avenue sa Lahug. Pag-abot nako sa Lahug Elementary School nalantawan nako ang trak de karga nga mao gayud ang pagliko niini paingon sa nagpadayon nga construction nianang Robinsons diha.

Nagkubkob pa sila og pundasyon sa building mao nga grabe kapilit ang mga lapok nga ilang gihabwa. Makita man nimo sa karsada nga atubangan sa construction site.

Unya, kaniadtong Miyerkules sa gabii, nakaagi ‘sab ko sa dapit sa Banawa, Guadalupe nga ingon gihapon ang sitwasyon, dunay mga lapok nga nagpangatagak gihapon sa karsada ug gahi na. Dili na kadto sa Robinsons kun dili sa lain na usab nga construction.

Ang karsada gud nga “smooth” unta kaayo padaganan mag-untol-untol na ang sakyanan tungod sa mao nga mga lapok nga mobagtok sa karsada.

Maayo unta og ang mga hingtungdang kontraktor molimpyo sa mga lapok nga nangatagak sa karsada, dili ra ba g’yud. Maayo unta og ang kontraktor sa Robinson nga maghakut og lapok ang ilang mga trak de karga ayuhon ninyo nga walay lapok nga magpangatagak.

* * *

Nindot ang gihimo sa mga kawani sa City Hall nga did-an na nila kining daghan kaayo nga mga Automatic Tubig Machines (ATM) nga anha ra ibutang sa mga aseras.

Pastilan lagi og adunay mga tawo nga magbinuang pinaagi sa pagbutang og hugaw, daghan g’yud kaayo nga mga masakit. Nahitabo na bitaw na matud ni City Health Officer Stella Ygoña nga daghan ang nagkalibanga kay ang nainom nila nga tubig gikan sa ATM hugaw.

Ikaduha, wala g’yud ta masayod kun tinuod ba nga mineral water ang gibutang nila, basin og tubig ra kana nga gikuha direkta gikan sa MCWD unya gibaligya og mahal abi kay bugnaw. Aw dili man hinoon hugaw ang tubig sa MCWD apan kun ang tubig direkta ra nga gikuha gikan sa gripo, dili angay nga ibaligya’g mahal.