EDITORYAL - Way rason nganong ibalik pa ang death penalty

Lig-on  ang baruganan  sa Malacañang  sa di  na  pagpabalik  sa death penalty.

Ang  mga  Filipino  lain  og  taras  sa ubang  nasud  kinsa  mipatuman  sa silot  nga  kamatayon  batok  sa  mga  tawong  nakabuhat  og  bug-at  nga sala.

Kun  gipatuman   sa  ubang  nasud  ang   silot  nga  kamatayon,  ila lang  gihimong  pikon  ang  ilang  gobiyerno, kinsa  gideretso  paglaksi  ang  katungod  sa tawo  nga  magbag-o  sa kinabuhi.

Dinhi  sa nasud,  ihatag  sa  tawo  ang  tanan  niyang  gusto aron siya  mabuhi  ug  magbag-o  sa kinabuhi  gikan  sa iyang  pagpakasala  og  bug-at  nga  sala.

Ang  baruganan  sa kagamhanan  dinhi  mao  nga  kun  ang  usa  ka tawo  malamdagan sa hustong  giya  sa panghunahuna  ug  kahadlok  sa Dios,  maglikay  na  kini  sa pagbuhat  og  mga  bug-at  nga sala.

Busa gipalabi  niini  nga  mag-antos  sa silot  nga  life sentence   ang  usa  ka  tawo  nga  hilabihan  na kabug-at ang  sala,  kay  sa patyon  pinaagi sa death  penalty.

Way perpektong  tawo  nga  natawo  ning  kalibotana, busa  di  angay  nga patyon  ang  tawo    gumikan  lang  sa unsa  mang  sala  nga  iyang  nabuhat.

Hinuon  ang  tawong  dautan,  dautan  gayud gawas  kun lisoon  sa Dios  ang  iyang  hunahuna ngadto sa pagkamaayo  gikan  sa hilabihang  kadautan  niini.

Ang  pagpaantos  sa tawo  pinaagi  sa life sentence  sud  sa bilanggoan,  usa  ka  bug-at  nga  silot  nga  mas labaw  pa  sa kamatayon.

Ang  kinabuhi sa tawo  nga wa nay  kagawasan  gikan  sa pagkabilanggo  di  lalim  nga  paminawon.

Ang  uban  nangandoy  nga  unta  mamatay  sud  sa prisohan,  apan  tungod  kay di  mamatay,  ang  uban  maghikog.

Gisuwayan  kaniadto  ang  pagpatuman  sa silot  nga  kamatayon  dinhi  sa nasud, apan  daghan  ang  mibabag  sa maong  balaod.

Di lalim  nga  palandungon  sa  mga  tagtungod  ug  bisan  ni kinsa mang  tawo  kansang  hunahuna  kaantigo  moangkon  sa  iyang  sala  ang  usa  ka  tawo  nga  bitayonon  sa bug-at  niyang  sala.

Gumikan  kay  sakit  man  ang  maong silot  nga kamatayon,  giusab  ug  gipalabi  sa kagamhanan  ang  pagpatuman  sa life sentence.

Sa maong  silot,   bahala  na  og  adto  madugta sud  sa prisohan  basta  di lang  pugson  ang  pagpatuman  sa silot  nga  kamatayon.