Nagmika nga PDEA

Nganong luya man ang Philippine Drug Enforcement Agency (PDEA) sa iyang kampanya batok sa ginadiling drugas? Angayan ba natong toohan ang pasangil sa usa sa iyang mga ahente nga ang ila mismong labaw ang tigpanalipod sa mga drug lords?

Dinhi sa Central Visayas katagsa ra kitang makadungog nga adunay gidakop nga mga tigpayuhotan og ginadiling drugas ang nahisgotang buhatan ug kun aduna may gidakop kadto lamang mga yamokmok. Ang ulahi natong nadunggan nga aduna silay gidakop kadtong igsoon sa kapitan  sa usa ka barangay sa dakbayan sa Lapu-lapu pero duda ko nga ila kadtong gihimo tungod kay gitamparos ang ilang dagway sa mga taga National Bureau of Investigation nga nakadakop ug nakasakmit og shabu nga mikantidad og minilyon.

Kun katagsa ra kitang makadungog nga nanakop og mga tigpayuhotan og ginadiling ang mga sakop sa Philippine Drug Enforcement Agency dinhi sa Central Visayas ilabi na sa dakbayan sa Sugbo kanunay usab kitang makadungog og sulti-sulti nga nangadato na ang mga sakop sa nahisgotang buhatan. Unsa may buot ipasabot niini?

Tungod sa ka luya sa nahisgotang buhatan ang lalawigan sa Bohol nga wala madunggi nga kusog sa drugas, sikat ug nailhan na sa negosyo sa ginadiling drugas. Sa amo lang lungsod sa Bien Unido, mga kaliwat na mismo og polis ug politiko ang nag negosyo. Wala pa ni kaniadto. Ang akong nahibaw-an nga suliran sa among lungsod kaniadto mao lamang ang mga kawatan ug sumbagay sa mga batan-on nga mga hubog ug nag-ilog sa mga babayeng ilang gipangulitawhan ug away sa mga libakira pero karon drugas na.

Tungod sa ka luya ug kay nagmika ang Philippine Drug Enforcement Agency (PDEA) ako nahadlok nga mograbe pa ang suliran sa ginadiling drugas sa lalawigan sa Bohol ilabi na nga aduna karoy napiling magbabalaud ug ubang mga opisyal sa nahisgotang lalawigan nga giingong mga tiggamitan og ginadiling drugas ug ang uban mga drug lords pa.

Unsa man  ang nakapaluya sa mga sakop sa PDEA sa ilang kampanya batok sa ginadiling drugas? Ang kakuwang ba sa pundo sa ilang buhatan ang nakapaluya sa ilang kampanya? Ang kakuwang ba sa ilang personnel ang atong tumbokon nga hinungdan sa ilang kaluya? O ba kaha ang mga drug lords nga nagpaburot sa ilang mga bulsa ang atong matumbok. Hoy mata ug bangon na mo mga taga PDEA.