Ang gobyerno ba tigprotihir sa ginadiling drugas?

Daghan nang mga Pinoy ang gipangbitay didto sa gawas sa nasud tungod sa pagpalusot og ginadiling drugas. Ang pipila kanila ang gipangbitay sa nasud sa China nga hugot kaayong migukod ug milutos sa mga tigpayuhotan og ginadiling drugas.

Karon lain na usab nga Pinoy ang gikatakdang bitayon o patyon didto sa China tungod gihapon sa pagpalusot og ginadiling drugas. Ang mga sakop sa pamilya ning maong Pinoy gihatagan na og gamay nga kahigayonan sa gobyerno sa China nga makakita sa kataposang higayon sa ilang mahal sa kinabuhi nga gikatakda nang bitayon sa dili madugay.

Ang gobyerno sa China determinado na nga mobitay o mopatay sa Pinoy drug mule human balibari ang Pilipinas nga mapadala si bise presidente Jejomar Binay sa ilang nasud aron hangyoon ang ilang gobyerno nga dili dayonon ang pagpahamtang og silot kamatayon sa Pinoy drug mule o tigdala og ginadiling drugas.

Sigun sa atong nakita matag higayon nga aduna kitay kababayan nga gisilotan og kamatayon didto sa gawas sa nasud ang atong gobyerno dali dayon nga makaresponde ug makahimo og mga pamaagi aron dili madayon ang pagsilot sa atong kababayan og kamatayon. Akong gihangop ug gidayig ang pagka-concerned sa atong gobyerno ngadto nila. Ang wala lang nako mauyoni mao ang pagtabang sa atong gobyerno niadtong dili angayan nga tabangan tungod sa ilang pagpakauwaw sa atong nasud sa mga mata sa kanasuran sa tibook kalibotan.

Ang pagtabang niadtong mga drug mule nga mga Pinoy nga gipanghukman nga bitayon o patyon sa laing nasud kinahanglang dili koridason, kinahanglan nga pilion ang pagtabang kanila aron dili ta mapasanginlan sa atong silingan nga kanasuran nga tigpanalipod niadtong mga tigpalusot og mga ginadiling drugas.

Kinahanglan nga klarohon sa gobyerno ang patakaran niini sa pagtabang niadtong mga gipangsilotan og silot kamatayon tungod sa pagkalambigit sa ginadiling drugas. Kinahanglan nga ang tabangan sa gobyerno kadto lamang gipanghukman nga bitayon gumikan sa pagkalambigit  sa ginadiling drugas tungod kay nabiktima sila sa pangilad sa sindikato sa ginadiling drugas.

Kadtong gipanghukman nga patyon o bitayon tungod sa pagpalusot og ginadiling drugas gumikan kay mao gayod ang matang sa trabaho nga ilang gisudlan, dili sila tabangan tungod kay una, ila kining tinuyoan ug ikaduha nagpintal sila og dili maayong imahin sa atong nasud sa mga mata sa atong mga silingang kanasuran sa kalibotan. Kun ipadayon sa gobyerno ang pagtabang kanila daw sama ra sa gidasig sa atong gobyerno ang iyang katawhan ug sindikato sa ginadiling drugas sa pagpadayon sa ilang dili maayong binuhatan.