EDITORYAL - Ang mga batan-on nga gahi og ulo

Luyo  sa  kabaniog na  sa balita bahin  sa ka peligro  sa panigarilyo, misamot paglipang  ang  mga  batan-on  nga  misulod  na  ning  maong  bisyo.

Bisan  nasayud  sila  nga sa panigarilyo  dali  ra  nga  mamatay ang  tawo  gumikan sa nicotine  niini, apan  way  kabalaka, arisgado  ug  isug  kaayo  ang  mga  batan-on  sa pagsalikway  sa  kamatuoran  nga sa  sigarilyo  daghan  kaayong  naalaot.

Sa atubangan  sa mga  dagkong  kolihiyo  ug  unibersidad  ning  dakbayan, makita nato  nga  gikan  sa buntag  hangtud  sa gabii  sa mga  adlaw  nga  tingklase,  hayahay  kaayo  ang  mga  maninda  og  sigarilyo.

Naa  magtampunsisok  ang mga  bag-ohay  pang  nakakat-on  ug  kadtong  nangaraan  na  sa pagbuhot og  aso  sa sigarilyo.

Ang nakapait ra ba  kay  ang  kuwarta  nga  ilang  gigasto  ning maong  bisyo,  kuwarta  nga  hinagoan  sa ilang  mga  ginikanan.

Way  amahan  ug  inahan  nga  nagmando  kanila  nga  manigarilyo, apan  kun  gihimo  man  sa mga  estudyante  ang  pag-abusar  sa ilang  ginikanan,  kini  tungod  kay  wala  na  sila’y  respeto   kanila.

Nawad-an  sila  og  pagtahud  sa mga tawong  kansang  tinguha  way  lain  kundi  mahimo  silang  himsug  ug  motaas  ang  dagan  sa kinabuhi.

Sukad  sa pagkatawo nila,  giampingan  sila  pag-ayo  samtang  matulog, gisugal  sa inahan  ug  amahan  ang  ilang  kinabuhi  alang  sa pagmatuto  nga  matarong  sa ilang  mga anak.

Kini  tungod  kay  wa  magdahum   ang mga  ginikanan  nga  inigkadagko  sa ilang  gimahal  nga  mga  anak  mosagop  kini  sa  mga  bisyo  nga  makadaot  sa ilang  lawas.

Kun  ilang  kasab-an  masuko  ug  dayon  mosukol nga  nagpasabot  nga  wa  nila  kabalak-i ang   taliabot  nga  kaugmaon  nila.

Ang tawo  nga  makakat-on  sa panigarilyo,  di  usab  lisud  nimo  silang  taralon  aron  makakat-on  sa pag-inom  og  mga  alak.

Usahay  ang  uban nga  ingon  na  niini,  sayon  na lang  kaayo  nga  dad-on  sa  mga  sugalan  ug  uban  pang  mga  bisyo  nga  tataw  kaayong  makagusbat  sa kaugmaon  sa usa ka batan-on.

Kun  kini  mahitabo  sa  imong  anak,  igsoon, pag-umangkon  ug tanan  nimong  suod  sa kinabuhi, mahimong  ihangad nimo  sa langit ang  tanan tungod  kay  sa madugay  ug sa madali, mubo ra  ang kinabuhi  sa maong  batan-on.