EDITORYAL - Ang problema sa gidiling drugas

Sa matag pamunoan sa lungsod, siyudad  ug  lalawigan angay  nga  hatagan  niini  og  konsentrasyon  ang bahin  sa gidiling  drugas.

Usa kini  ka katungdanan  nga  matawag  nga  sagrado aron  mosumpo  sa maong  bisyo  nga mikuyanap  na  karon  sa katilingban.

Kun  ang  maong  bisyo  di  kahatagan  og  taas  nga pagtagad  sa  mga  kasamtangang opisyal  sa kagamhanan  nga  mosugod  na  og  lingkod  sa ilang  tagsa-tagsa  ka  buhatan  karon,  hayan  nga  lima  ka tuig  gikan  karon, halos  tanang  batan-on  sa matag  balay  adis-adis  na.

Busa  di  malalim  sud-ongon  sa  mga   ginikanan  nga ang  kaugalingon  nilang anak  usa  sa  mga  drug  adik  sa ilang  lugar.

Kun  ang  matag  sektor  di makighiusa  sa mga  ginikanan  sa paglusad  og kampanya  nga  magpugos  sa  ilang  mga anak  pagpugong gikan sa dautang  bisyo, unsaon  pagbaton  og kahusay ug  kalinaw sa palibot.

Angay  timan-an  sa tanan  nga  ang  bata  dali  nga  makakat-on  sa pagpangawat kun  magsugod  na  sa  pagbisyo.

Una  niini  mao  ang  panigarilyo  ug  pakig-barkada,  ug  kun  anaa  na  diha  maniid  na  kun  unsay ilang  buhaton  aron  nga  di  hibaw-an  sa ilang  amahan  ug inahan  ang ilang  bisyo.

Tungod  sa maong  bisyo, labi  na  unyang  maglikay  ang  anak  sa pagpangayo  og  kuwarta  sa ginikanan  aron ipalit  og  shabu ug uban  pang  matang sa  gidiling  drugas, anha  na  kini  magsugod  og  pangutingkay  sa mga  butang  sa sulod sa balay  nga  halinonon.

Mamaligya  na  gani  kini  og  mga  kaugalingong  butang,  o kaha  mga  alahas  sa ginikanan  ug  mga  appliance, anha  na  diha  makaingon  ang  ginikanan  nga  milampos  ra  sa  pagkabisyuso  ang ilang anak.

Anha  na  magsugod  og  kalgas  sa ulo  ang  usa  ka amahan  kay  maglisud  na  siya  sa pagpitol sa  iyang  anak  nga  tua  na  magtungkawo  sa mga  barkada  imbis  unta  sa iyang  leksyon sa eskuylahan.

Mao bitaw  nga  sa  kakusog  sa pagsalmot  sa  mga  batan-on  niining  makaboang  nga  bisyo  sa kinabuhi,  dinhi  unta  mopunting  ang  mga  bag-ong  pamunoan  karon  sa lungsod, siyudad  ug lalawigan  bahin  sa maayong  mga  programa  nga makapahadlok  sa  mga  kabataan  gikan  sa pagbisyo.

Kay gawas  kun  mao  kini  buhaton  sa  mga  opisyal  sa kagamhanan hayan  nga  inay  maluya,  mosamot  na  hinuon  ang  kasipat  sa  kabataan  sa pagsuway  pagsalmot  sa maong  bisyo nga  ikamatay o ikabanlud  niya  sa prisohan.