EDITORYAL - Ang pagsaka sa kriminalidad karon

Giangkon sa kapolisan ang  pagsiaw sa krimen  ning mga  panahona, gikan sa  pinusilay, panagit, lugos, dunggab, tulis, kawat, labni ug  panguot.

Nagpakita  nga bisan  unsa  kahigpit  sa balaod, apan  ang  tawo mangita gayud og  paagi   nga  makahimo  og  krimen  sa  dakong  pagtuo  nga  makalingkawas  sila  sa silot.

Aw  hinuon  di man kalikayan  nga  kun  makaikyas  ka  sa silot karon,  may  panahon  ra  nga  mabanlod  ikaw  sa laang  aron  ang  sala  nga  dugay na nimong nabuhat  mosingil  og  bayad  aron  ikaw  kasilotan.

Kining pagsulbong  sa nagkalain-laing krimen  nagpasabot  nga  isug kaayo  ang  tawo sa  pagbuhat  og  sala  nga batok  sa kinabuhi, kabtangan  ug  dungog  sa tawo.

Di kalikayan  nga  bisan  bug-at ang  silot sa pagpatay, pagpanglugos ug uban pa,  apan  ambot  kun  ngano  nga  di man mahadlok  ang  tawo  sa  pagbuhat  niini.

Usa  sa dako kaayong  abag  sa pagsaka  sa kriminalidad  karon mao ang  motorsiklo  nga dali ra silang  makaikyas  kay makapadagan  man  dayon  og  kusog  sa ilang  sakyanan.

Laing  makapaisog  sa  mga  kriminal  mao  ang  shabu  ug  uban  pang  matang sa gidiling  drugas,  nga  kun  makasimhot  sila  dali ra kaayong  moinit  ang  ilang  ulo  ug  di  maghunahuna  nga  may  taliabot  nga  silot  silang  atubangon.

Kining  mga  butanga  karon nag-anam  pagkaabunda  nga  nagpasabot nga  maoy  kaabag  sa tawo aron  mohimo  og krimen matag  karon  ug  unya.

Di na  motahud  sa balaod  ug  sa  mga  otoridad  nga nagpatuman  sa balaod  tungod  kay  ang  anaa  sa hunahuna  mao  ang  kaanindot  buhaton  sa krimen.

Ang  kapolisan walay  mahimo  aron  santaon  ang  krimen  nga wa  pa mahitabo  sa  palibot , kundi  igo  nalang  sila  sa  pagsud-ong  sa krimen nga  human  na   mahitabo.

Kun  hiabtan  nila  ang  kriminal  mahimong   sikopon  nila  sa malinawong  paagi   o  kaha  kun  mosukol  mapugos  sila  sa paggamit  sa ilang  hinagiban   uban  pagpanalipod  sa  ilang  kaugalingon.

Kun misaka  man  ang  krimen  karon   nagpasabot  lamang  nga nag-anam  na  ka isug  sa tawo  mobuhat  sa krimen  lahi  kaniadto  nga  nihit  ang  motorsiklo, shabu  ug  uban  pang  gidiling  drugas.