Ang mga hunahuna nga gipadayag dinhi iya ra sa tagsulat ug walay labot ang Banat News ug mga sakop niini.
Mipatuman na usab og laing usbaw ang mga kompaniya sa lana sa gibaligya nilang produkto nga gilangkob sa P0. 45 alang sa presyo sa matag litro sa gasoline ug P0. 90 nga usbaw alang sa matag litro sa krudo ug kerosene sa miaging adlaw.
Ang pag-usbaw sa presyo sa produkto petrolyo sa kalibutanon nga pagpalit sa matag baril sa produktong petrolyo mao gihapon ang naandan nga ilang gihapin nga katarungan nga maoy nakaaghat kanila sa pagpausbaw usab sa presyo sa ilang pagbaligya sa matag litro sa produktong petrolyo dinhi sa nasud.
Matud pa nila nga dako usab og gikatampo sa maong pag-usbaw sa presyo sa produktong petrolyo ang paghagsa sa kantidad sa peso batok sa salaping dolyares niining panahona.
Ang bag-o lang nga gipatuman nga pagpausbaw sa matag litro sa produkto petrolyo sa mga kompaniya sa lana maoy ikawalo na nga higayon nga pag-usbaw human sa pagpahigayon sa 2013 mid-term election.
Nabatasan na hinuon kini sa mga magpapatigayon dinhi sa nasud nga kun mousbaw ang presyo sa matag litro sa produktong petrolyo masinati usab ang pag-usbaw sa presyo sa mga nag-unang palaliton.
Kun mousbaw man gani ang presyo matag litro sa produktong petrolyo maoy atong mapaabot ang pag-usbaw usab unya sa minimum nga plitehan sa publikong sakyanan sama sa PUJ ug taxi ug mokuyog usab niini ang pag-usbaw sa presyo sa mga nag-unang palaliton sama sa bugas ug mga linatang pagkaon.
Bisan ang mga traysikad drayber nga wala mogamit og gasolina sa ilang pagpamasahero mopausbaw usab sa ilang plitehan sa katarungan nga mahal man ang matag kilo sa bugas ug sud-an nga ilang gikaon nga nakahatag og kabaskog sa ilang kalawasan.