Kining mga hubog nga maglaroy-laroy sa kadalanan ilabi na sa kagabhion, makahatag og kahasol sa mga motorista nga makaigo o makadumbol kanila.
Biktima ko niini. Niadtong miaging gabii, usa ka lalaking puwerteng huboga akong nasakdapan sa may dalan New Road (Imus), hinungdan sa iyang pagka-ospital.
Human matambali sa ospital, mipauli ra ang hubog sa iyang gitrabahoan. Apan nakatilaw na ko sa kahasol nga nahatag niini tungod sa kahanggaw sa maong hubog nga naglaroylaroy sa mangitngit nga karsada ug maghadla-hadla sa mga sakyanan nga mangagi.
Tiaw mo na, hapit nang buntag ko nakauli sa Minglanilla aron lang sa pag-atiman sa hubog. Nakagasto ko og dako-dako, wala pay labot sa windshield nga nabuak, ug kining tanan tungod ra gyud sa kabadlongon niining huboga.
Maayo tingaleng hunahunaon sa mga magbabalaod sa siyudad sa Sugbo, Mandaue ug Lapulapu ang pagpanday og ordinansa nga magsilot ug mag-multa sa mga hubog nga maglaroylaroy bisan sa kalango nila sa bino nga ilang giinom.
Ang mga barangay angayan usab nga mamadlong niining mga hubog nga maglaroylaroy aron dili makahasol og laing tawo.
Ang motorista bisan magbantay sa iyang pagmaneho sa iyang sakyanan mahisugamak gyud kun makadasmag, makadumbol o makasaghid og hubog. Kay ang hubog angayan man gyud dad-on sa ospital ug ang inosenteng motorista mahisugamak sa paggasto sa pagpa-ospital sa hubog.
Dakong kalangay ang mahimo niini.
* * *
Akong awhagon si Mayor Mike Rama sa pag-obserbar sa kadalanan sa dakbayan sa Sugbo nga hilabihan kangitngit.
Daghan na kaayo kining mga karsadaha pero sa akong tan-aw wala pa gyud magtagad ang kagamhanan sa siyudad sa Sugbo niini.
Sama pananglit sa dalan Imus atbang sa St. Peters Memorial Chapel, hilabihan kangitngit ning lugara nga kun adunay tawo nga maglakaw mahisugamak sa kaalaotan.
Hain na man ang siyudad sa Sugbo kaniadto nga hilabihan kahayag?
Hain na man ang siyudad sa Sugbo kang kansang mga karsada nabulit sa mga dagkong suga sama sa mercury?
Duawa ninyo ang dalan Imus, dili ba mahadlok kang sugaton og agta kay gawas nga ngitngit kaayo, ang mga sanga-sanga sa mga punoan sa kahoy mitabon na sa karsada.
Tagda intawon kini, Mayor Mike!