Usa sa garbo sa mga Bisaya mao ang mitaliwan na nga novelty singer nga si Yoyoy Villame.
Daghan ang mga awit binisaya nga iyang gipasikat kaniadto.
Apan bisan sa iyang pagtaliwan wala hingpit mahanaw ang iyang talento. Kini tungod kay nagbilin siya og kabilin alang sa mga tawong mahiligon sa awit binisaya.
Gawas sa mga awit ug komposisyon iyang gibilin ang talento sa pag-awit diha sa iyang anak nga si Hanna.
Akong nahimamat ang anak ni Yoyoy niadtong miaging Sabado pinaagi sa akong higala nga si Rey Martinez.
Atol sa among panaghimamat akong nasayran nga sa wala pa motaliwan si Yoyoy nagbilin ni og mga komposisyon.
Aron paghatag og katumanan sa kahago sa iyang amahan, girekord ni Hanna ang maong mga komposisyon ubos sa YV records ug eksklusibong giapud-apod sa Ivory Records.
Si Hanna usab mismo ang miawit sa mga komposisyon sa iyang amahan.
Lakip sa maong mga komposisyon nga giawit ni Hanna mao ang mga kantang; Gugmang Matuod, Ikaw Day Higugmaon, Unsa Pay Buhaton Ko, Bisayang Tagalog, ug Mahal...Bakit?
Nanghinaut si Hanna nga suportahan sa mga bisaya ang iyang album nga giulohan og "Hanna Villame Dream Comes".
* * *
Unsa bay sala ni Sr. Supt. Mariano Natuel nganong gi-ayran siya ni Mayor Mike Rama?
Maayo man unta ang gipakita ni Natuel nga performance apan nganong di gyud siya madawat ni Rama?
Politika ang hinungdan niini. Nagtuo man gud siya nga di niya kini tawo. Buot niya nga iya gyud nga tinudlo ang molingkod aron mas sayon niyang masugo.
Alang nako di maayo nga atong iangin ang kapolisan sa politika. Angayang hatagan og higayon si Natuel nga ipakita ang iyang katakos.
Si Natuel usa ka gentleman nga opisyal sa kapolisan. Gani bisan sa pag-ayad sa mayor sa iyang liderato gipakita niini ang iyang katakos.
* * *