Daghan gayod ang gibati og kalibog sa gipasiatab sa kagamhanan nga paglambo sa ekonomikanhong kahimtang sa nasud nga Pilipinhon daghan pa man gihapon sa iyang katawhan ang nagpabilin nga nagkagidlay ug nag-ilaid sa kalisod.
Matud pa nila asa man kaha ang hinungdan nga taliwala sa giingong paglambo sa ekonomikanhong kahimtang sa nasud wala man kini matagamtam sa katawhan sanglit gawas nga nagpadayon ang pagsulbong sa presyo sa mga nag-unang palaliton daghan pa gayod ang walay trabaho ug wala makabaton og maayong panginabuhian. Ang panahom nga nagpabilin nga nagkagidlay ug nag-ilaid nga kahimtang sa nasud ilang gibase sa gikataho sa National Statistic Office (NSO) nga nagbutyag ang pag-usbaw sa gidaghanong katawhan sa Pilipinas ang walay trabaho gikan sa 6.9 nga gidaghanon ngadto na sa 7.5 porsiyento ang walay trabaho niining panahona.
Gitataw nila nga gikataho usab sa NSO ang nagpadayon nga pagpanangtang sa mga trabahante sa ilang gitrabahoang establisamento taliwala kini sa gikataho nga pagsulbong sa ekonomiya sa nasud og 7.8 porsiyento sa unang quarter niining tuiga. Naglakip na niini ang 620,000 ka mga trabahante sa agrikultura ang nawagtangan sa ilang trabaho apan gamay lamang ang pag-usbaw sa gidaghanon sa mga nagtrabaho sa industriya nga ang kadaghanan dili permamente kay ubos man sa unom lamang ka bulan nga kontrata.
Dugang pa nila nga ang maong gidaghanon sa katawhan nga Pilipino nga nawad-an og trabaho maoy gipaabot ang pagsulbong pa gayod sa mga Pilipino nga walay trabaho sanglit sa pag-asumer sa katungdanan karong Hulyo niining tuiga sa mga piniling opisyal sa kagamhanan nga midaug sa miaging 2013 mid-term election, siguro man usab nga matangtang sa trabaho ang mga casual nga kawani nga nagsuporta sa naparot nga kaatbang niining kandidato.