Kinsa kaha’y namakak?

Wala gayud ko mokuha sa balita kabahin sa gisumiter nga Statements of Contribution & Expenses (SOCE) sa mga milansar kaniadtong miaging eleksyon.

Nasayud man gud nga bakak ang mga “figures” nga ilang gibutang sa kantidad nga nadawat ug nagasto sa ilang kandidatura sa lainlaing pwesto sa kagamhanan.

Magkatawa lang gud ko nga maminaw sa report. Ang among news director sa DYLA nga si Jhunnex Napallacan ako g’yud nga giingnan nga siya la’y mobalita pinaagi sa pagbasa sa mantalaan kay dili nako kaya nga ilaron ang publiko.

Dili g’yud hinoon ako maoy mangilad kay ang mga kandidato man maoy nagbuhat sa ilang SOCE apan bisan pa, dili ko gusto nga mobalita nianang maong isyu.

Mobalita tingali ko sa higayon nga ang Comelec moimbistigar na sa pagpamakak sa mga kandidato. Aw, sumala gud nakabasa man kamo sa mga balita nga si Annabelle Rama mitug-an nga gusto niya nga bawion ang gihatag niya nga tulo ka milyon ka pesos ngadto ni Mayor Michael Rama isip “campaign funds.”

Nakalimot si Annabelle nga ang gibutang niya nga kantidad sa iyang mga gasto sa iyang SOCE kapin lang sa tunga sa milyon ka pesos.

* * *

Kinsa ba ang namakak sa mag-agaw nga si Mayor Rama ug Annabelle Rama? Ingon si Anabelle nga gihatagan niya og tulo ka milyon ka pesos nga campaign funds si Mike aron gastohon sa eleksyon.

Unya nganong wala man lagi kini maapil sa Statements of Constribution & Expenses (SOCE) ni Mayor Rama? Dili ba kinahanglan man nga ideklarar sa mga kandidato ang kantidad ug bisan unsa nga donasyon nga ilang madawat alang sa ilang kandidatura?

Mao kana nga nakaingon ko nga kinsa kaha kanila ni Annabelle ug Mike ang namakak? He! He! He!

Apan bana-bana nako, wala mamakak si Annabelle sa iyang gitug-an nga mihatag siya’g tulo ka milyon ka pesos nga campaign funds alang sa Team Rama.

* * *

Dili tinuod nga si Kongresista Tomas R. Osmeña nagplano paglansar pagka kapitan sa Guadalupe, ang barangay nga anaa siya magpuyo.

Gitug-anan ko ni Tommy nga dili tinuod ang maong balita. Bitaw, bisan ako mohilak ko “on air” sa radyo kun molansar pagka kapitan si Tommy kay imposible g’yud kini nga mahitabo.

Tabla ra kini nga ang presidente sa nasud human sa iyang termino molansar pagka konsehal sa lungsod. Arang-arang na lang si kanhi presidente Arroyo kay kongresista man ang gidaganan.

Matud hinoon ni Tommy nga moaktibo gayud siya sa politika sa barangay Guadalupe kun madayon ang eleksyon sa barangay karong Oktubre.