Tulo ka mga pagbati

Ang bili sa tawo dili nato masukod sa iyang mahimo lamang kun dili sa iyang tinud-anay nga bili ingon nga tawo ug imong anak. Dili kalikayan ang kapalpakan sa kinabuhi. Tudloi ang imong anak sa pagdawat ug pag-angkon nga diha sa kinabuhi dili sa tanang higayon kita magmalampuson. Adunay mga higayon nga masinati nato ang kaparotan.

Mga babag sa pagtahod sa kaugalingon

1. Mga ginikanan nga ubos og panlantaw sa ilang kaugalingon. Dili ikalimod nga daghang mga ginikanan ubos pud og panlantaw sa ilang kaugalingon nga tungod niini ila kining mapahid ngadto sa ilang mga anak. Nga tungod niini, nahimo silang makakita dayon sa sayop sa ilang mga anak. Nahimo silang perfectionist. Alang sa bata, malisud alang kaniya ang pagpahimuot sa iyang mga ginikanan. Pun-an pa sa iyang palibot didto sa tulonghaan. Tungod niini, ang “bossy” nga kinaiya sa ginikanan maoy nakapahimo sa anak nga makahunahuna nga wala siya’y kapasidad nga makahimo og mga butang nga angayan niyang himuon. Sa laktod, matanom sa hunahuna sa bata nga siya walay kaantigohan nga mamahimong magmamugnaon (creative). Matud pa: “Authoritarian parents weaken self-worth.”

2. Naghinobrang pagpanalipod (over-protective). Kini usab dili makatabang aron ang bata makakat-on ug maandam sa pag-atubang sa mga kasakitan nga dili kalikayan. Gianad ang bata nga mabuhi nga magsalig sa gahom ug panalipod sa iyang mga ginikanan. Imbis molambo ug mohamtong ang bata dili na hinuon siya makahimo niini gumikan sa naghinobrang pagbantay sa iyang ginikanan.