Banderang gision

Niadtong milabay’ng Independence Day dihay daghang mga bandera nato nga nagkagidlay na. Hugaw ug gision. Ang uban di na blue ang blue kundili abu-abohon na.

Ang nagdispli kon nagpakayab niining watas-watas na nga bandera mao ang pipila ka mga eskuylahan ug buhatan sa gobyerno.

* * *

Di ba nga duna may Flag Law kon balaud bahin sa bandera diin gidili ang pagdispli og watawat, sa tinagalog pa, nga nagkagidlay?

Angay unta nga kining maong balaud ipatuman gayud tungod kay ang bandera simbolo sa atong nasud.

Kun unsay matang kun kahimtang sa bandera mo-reflect kini sa atong nasud ... kon sa kahimtang sa atong nasud.

* * *

Gani dihay pipila ka mga tawo nga mitandi sa kahimtang sa Pilipinas sa gision nga bandera nga ilang nakit-an.

Dihay usa ka tawo kinsa nadunggan nga nag-ingon: “Kanang gision kon mora na’g trapo nga bandera simbolo ba kana sa atong nasud?

* * *

Angay unta nga hatagan sa gobyerno og bag-ong bandera ang mga eskuylahan ug buhatan sa kagamhanan.

Kun dili maka-afford ang gobyerno, wa ba dihay mga pribadong pundok nga makatampo og mga bag-ong bandera isip usa ka civic kon patriotic duty nila sa nasud?

* * *

TRIVIA. Daghang salamat sa atong mga suking magbabasa sa Banat News diha sa Duljo ug mga kasikbit nga dapit. Maayong buntag ug God bless.