Ang kadalanan sa panahon sa ting-ulan

Sa miaging mga bulan nga naglagiting ang kainit sa panahon maoy namatikdan ang paspas usab nga pagpang-aspalto ug pagpangsemento sa mga dalan sa  pagpahimulos sa higayon nga dili mapakgang ang kaugmaran.

Bisan kun ang pagpahimulos sa panahon sa ting-init maoy nagtukmod sa kagamhanan sa pagpatuman sa mga proyektong pang-imprastraktura wala gihapon ikahiklin ang katahap sa katawhan nga gituyo kini alang sa politikanhong kalamboan.

Daghan ang nag-ingon nga makapatahap kaayo nga gipaspasan  ang pagpatuman sa maong mga proyekto sa kadalanan kay niadtong layo pa ang mga adlaw wala man kaayo mokisaw ang mga buhatan sa enhinyero sa munisipyo o dakbayan alang sa lokal nga mga dalan ug Department of Public Works (DPWH) 7  alang sa nasudnong kadalanan nga maoy gitahasan sa   pagpatuman sa mga proyekto nga naglambigit ang pang-imprastraktura.

Gipangatarungan hinuon sa ilang mga opisyal sa maong mga buhatan sa kagamhanan ang mga kakulian nga sagad maoy hinungdan niini nga naglakip sa kalangan sa pag-andam sa plano ug  ang pagpagawas sa gahin nga salapi alang sa maong proyekto.

Bisan pa sa kalangan sa pagpatuman sa maong mga proyekto sa gihapon daghan usab ang nahinangop  nga motorista sanglit mohanoy na man ang ilang sakyanan sa ilang pagpadagan human sa pagpang-aspalto ug gipangsemento nga kadalanan.

Ang lamang niining panahon sa pagbunok kanunay sa ulan kay kun gilamolamo lamang ang pagtrabaho ang gipalambo nga kadalanan dako man ang kahigayonan nga dali kining maguba ug mobalik na usab ang dagkong lungag ug mga libaong sa paglabay sa pipila lamang ka bulan kay ibanlas man ang aspalto  ug semento ngadto  sa kadagatan.