Gibantayan ang pagkaon sa kabataan

Ang mga hunahuna nga gipadayag dinhi iya ra sa tagsulat ug walay labot ang Banat News ug mga sakop niini.

Gipahimangnoan  sa kadagkoan sa Department of Education (DepEd) ang mga nagdumala og canteen sa mga publikong tulunghaan labot sa ibaligyang pagkaon sa ilang mga tulunghaan taliwala sa pagbukas na sa klase niining tuiga.

Gitumong ang maong pahimangno labot sa paglikay  alang sa pagbaligya og pagkaon nga makahatag lamang og kadaut sa panglawas sa makapalit nga kabataan gawas nga walay makuhang sustansiya nga makahatag og dugang kahimsog sa ilang panglawas.

Sa nasayran nga naandan na gayod sa mga ginikanan ang pagpadala og kuwarta isip balon sa nagtungha nilang kabataan sa tuyo nga makapalit kini og pagkaon sa higayon nga bation kini og kagutom.

Ang mga batid sa panglawas nag-ingon nga daghang pagkaon nga kun maoy ibaligya sa canteen sa mga publikong tulunghaan mao usab ang paliton sa kabataan kay ganahan man sila niining mokaon.

Nag-una na niini ang mga funsnack nga kun maoy ibaligya sagad mao usab kini ang paliton sa mga bata kay malingaw man sila sa maong matang sa pagkaon nga ang kadaghanan ilang  parisan sa pag-inom og softdrinks.

Matud pa sa mga batid sa panglawas nga dili  makahatag og dugang kahimsog sa  panglawas sa kabataan ang funsnacks ug maayo pa ang lagutmon, sama sa linung-ag nga kamote o gimantikaang saging nga parisan og juice kun adunay ikapalit apan kun wala kay kabus ang ginikanan labing maayo nga parisan na lang sa pag-inom og tubig aron dili matuk-an.