Nakapuypoy sa kasuko

Atol sa ikaduha ug mas dakong rally sa mga dumadapig ni suspended governor Gwen Garcia dayong Pasko sa niaging tuig, wa kahibawo si Noy Pabling Garcia, ang outgoing nga kongresista sa ikaduhang distrito sa Sugbo, nga ako siyang gipanid-an. Wa siya’y paagi nga makabantay sa akong pagpaniid niya. Segun sa Google, 17 ka kilometro ang nag-uwang namo. Samtang didto siya sa balkonahe sa tungatunga sa Cebu Provincial Capitol building, nagtan-aw ko niya pinaagi sa live footage sa among mga kamera gikan sa ABS-CBN Broadcast Complex sa Jagobiao, Mandaue City.

Pasayloa, Noy Pabling, kun makabasa ka ini, apan ang imong postura maoy nakapakumbinser nako nga di imong pagbuot ang pagmagahi sa imong kamaguwangan pagpabilin sa iyang buhatan.

* * *

Sukwahi sa kadasig ug kaisog sa mga nangapil sa rally sa tugkaran sa Kapitolyo, masulub-on ang dagway ni Noy Pabling samtang nag-ambo nila. Gisuhid niya ang nikatap nilang mga dumadapig nga nakabara sa trapiko sa kinasang-an sa mga dan Osmeña ug Escario.

Pagkataudtaod, nisuliyaw ang mga nanambong sa rally nga nitan-aw sa balkonahe nga nahimutangan ni Noy Pabling. Nigimok sab ang iyang mga katapad ug mapahiyumon nga nilingi sa ilang luyo. Nigawas si Gwen ug nihangop sa ilang mga dumadapig sa balkonahe ug niwarawara sa mga dumadapig sa ubos. Si Noy Pabling padayong naglantaw sa unahan.

* * *

Kaingon nako nga tungod sa iyang pangedaron wa dayon kadungog si Noy Pabling sa makabungog nga siyagit sa ngan sa iyang anak. Kaingon nako nga wa dayon siyang kabantay sa pag-abot ug pagwarawara sa iyang anak pila ra ka dangaw gikan sa iyang nahimutangan.

Bisan dihang nikanaog na si Gwen paingon sa ilang mga dumadapig, si Noy Pabling wa gihapon maggunok. Bisan nitungtong na sa entablado ug nidiskurso nang gobernadora, si Noy Pabling padayong nilantaw sa layong unahan. Naputol ang akong pagpaniid ni Noy Pabling kay giliwag nang among mga kamera ngadto sa entablado dayong sugod sa TV Patrol Central Visayas.

* * *

Ang nabantang nga kakuwang og kadasig ni Noy Pabling sa rally nakahatag og dugang kahulogan sa mga huhungihong nga gitambagan niya si Gobernador Garcia pagbiya na sa Kapitolyo dihang  napakyas sila pagkuha og temporary restraining order gikan sa Court of Appeals. Apan sama sa naandan sukad nga nahimong consultant sa Kapitolyo, gisupak ni Gwen si Noy Pabling.

Kasaligang mga tinubdan nagbutyag nga si Noy Pabling ang nihangyo ni Cebu Archbishop Jose Palma pagduaw sa buhatan ni Gwen. Di aron suportahan kun dili aron pakalmahon ug kumbinsihon nga motuman na lang sa suspension order sa Malakanyang. Tingali ang kamabugnawon ni Noy Pabling ug ang mga pangaliya ni Arsobispo Palma maoy nakapuypoy sa kasuko ni Gobernador Garcia, maong boluntaryo nga nibiya sa iyang buhatan.

* * *

E-mail: [email protected].