Liboan ka mga tinun-an ang mobalik na sa klase sugod karong adlawa. Apan sama sa niaging katuigan nagpabilin ang karaang problema sa mga pampublikong tunghaan.
Mosugat gihapon sa mga estudyante karong adlawa ang huot nga mga classrooms, kakuwang sa mga bangko, kakuwang sa mga magtutudlo, ug daghan pa nga mga kakuwangan.
Nadugang sa listahan sa mga kakuwangan nunot sa pagpatuman sa K to 12 mao ang mga libro ug manual sa mga maestra.
Sa miaging school year diin maoy unang tuig sa pagpatuman sa K to 12 naproblema nang daan ang mga maestra.
Naglaum ko nga makurihian ug masulbad ang maong kakuwangan karong tuiga, apan nagpabilin gihapon ang maong suliran. Daghan sa mga magtutudlo sa Grade 7 ang nagbagulbol tungod kay way libro nga gihatag ang Department of Education alang sa mga tinun-an.
Mao nga daghan nila naglibog unsaon pagpatuman ang bag-ong sistema. Kini tungod kay samtang gitudloan sila unsaon kini pagpatuman apan wa man say materyales nga magamit.
Ang gihimo intawon sa ubang magtutudlo nanghuwam sa mga estudyante sa private school. Apan bisan duna na sila’y libro nga nahuwaman dili gihapon hingpit nila nga masunod ang gimbut-an sa programa sa DepEd tungod kay way teacher's manual nga magamit.
Ang kasamtangang sitwasyon nagpakita sa kainutil niining atong gobyerno. Nagpalumaluma og patuman og bag-ong programa apan dili diay andam sa tanang panginahanglan.
Way kapuslanan ang pagpatuman sa mas taas nga panahon sa pagtungha, hinuon naghatag lang kini og purhisyo sa mga ginikanan, tungod kay wa man gihapoy makuha ang mga estudyante tungod sa kakuwang og libro.
* * *
Panahon na sab sa kampanya nunot sa nagdangarang nga eleksyon sa barangay.
Panahon na sab karon sa mga saad sa politiko'ng bakakon. Karon subli nga madunggan sa katawhan ang way kamatayong mga saad nga gilumotan nalang ug wala gyud kahatagi og katumanan.
Apan di pa awahi ang tanan. Karon sab maoy panahon sa pagpaningil sa mga politiko'ng way palabra de onor.
Panahon na nga ato silang sudyaan sa mga saad nga napakyas ug sigurohon nga sa moabot eleksyon sa barangay di na silang kahatagan og mandato.
Hinaut di mahaylo sa kwarta ang katawhan. Sagad ra ba sa mga politikong bakakon nagsalig lang sa ilang kwarta. Dili mahadlok nga sudyaan sa saad nga gipakyas tungod kay sila nagtoo nga bisan kun way nahimo modaug sila gihapon kun kwarta maoy palihukon.
* * *