Dili gayud tinuod ang gibutyag ni Sir Henry Sanchez nga abi kay gamay ra ang kantidad sa mga tambal ug medisina nga nagamit sa mga beneficiary sa CHAMP nga nagpasabot kuno kini nga wala kaayo maproblema og tambal ang katawhan.
Kini si Sir Henry maoy nagdumala sa CHAMP kon City Hospitalization Assistance and Medicines Program. Unsaon nga atul sa pag-atubang niya sa mga sakop sa media didto sa City Hall wala intawon ko makatungha.
Atul sa iyang briefing, gibutyag ni Sanchez nga sa unang upat ka buwan karong tuiga nagpaabot unta sila nga adunay 4,400 ka pasyente nga mo-avail sa CHAMP apan 3,489 ra kuno ang miaplay unya gamay pa gayud ang nakuha nga mga tambal.
Ang rason niana nga gamay ra ang mga tambal nga nakuha tungod kay dili kompleto sa mga tambal ug medisina ang mga botika nga gikontrata sa dakbayan aron mohatag sa gikinahanglan sa mga CHAMP beneficiaries.
Husto ang gihimo sa dakbayan nga naghinay-hinay na sila pagbutang og botika nga iya gayud sa CHAMP nga anaa mahimutang sa Cebu City Medical Center (CCMC) apan maayo lagi og mabutangan kini og igo nga suplay nga mga tambal.
Naluoy kaayo ko sa daghang mga kabus nga nanginahanglan unta og tambal ug nagpakiluoy sa CHAMP nga matabangan apan inig-adto nila sa botika nga gikontrata sa dakbayan igo lang sila nga mabawo kay wala’y stocks.
Unsaon, kining Pro-CHAMP, Botika sa Masa nga usahay tawgon ‘sab og Dominique Pharmaceutical ug ang PRO-Inay dili man hitsas sa mga tambal. Tingali usa ‘sab sa rason niana mao nga daghang mga tambal nga nahatag nila sa mga CHAMP beneficiaries dugay ‘sab nga gibayran sa dakbayan.
Apan bisan og dugay man nga gibayran sa dakbayan ang giutang kanila nga tambal, kun nagpatuga-tuga sila’g sulod sa maong negosyo kinahanglang andam sila. Total ang kantidad sa mga tambal nga ilang gipabaligya pinaagi sa CHAMP gipaburot man sab nila’g maayo.
Ang usa lagi ka item nga gibaligya sa pribadong botika og P700 apan sa Botika sa Masa nagkantidad og P910. Pastilan, angay gayud nga tagdon dayon kining maong problema.
Gibalik-balik nako kining maong isyu dili tungod kay wala ko makakuha sa tanang tambal nga akong gikinahanglan. Gituki nako kini bisan og nasiguro ko nga mangasuko ang akong amigo sa City Hall kay daghan ang makabenipisyo.
Awhagon lagi nako si Sir Henry nga adto ra gud sa (Botika sa Masa) mga alas tres sa hapon sir dili ba makakita ka sa mga beneficiaries sa CHAMP nga hapit na lang manghilak kun wala ang ilang mga gikinahanglang tambal.