EDITORIAL - Ang discount nga 75 porsiyento bug-at ra

Bisan  di ta  mga negosyante  apan  ang  balaudnon  nga  nag-awhag  paghatag  og diskuwento  nga  75  porsiyento  sa pagkaong paliton  sa senior citizen bug-at  baya. Maikog  usab  kita  sa  mga  negosyante  nga  naningkamot  nga moginansya  sa ilang  ginansya  ug  di kay maalakanse  niini.

Maayo  nga wa  aprobahi  ni  Presidente  Aquino  ang  maong  balaudnon  kay  sakit  kaayo  kini  alang  sa  mga  negosyante  ug  malagmit  kun  naaprobahan  pa  makapugos  kini  sa  mga  negosyante  og  pagkaon  sa pagtuon  unsaon  nila  pagpangita  og  paagi  nga mabawi  ang  ihatag  nilang  diskuwento   ngadto  sa  mga  senior.

Hinuon  sa  bahin  sa  mga  senior, pabor  baya  unta  kaayo  ang  maong  balaudnon  kanila.

Apan  bisan  pa  niana,  angay  usab  hunahunaon  nga  mabug-atan  usab  ang  negosyante  niini.

Sa pagkakaron  ang  balaod  nga  20 porsiyentong  diskuwento  sa  nagkalainlaing  serbisyo  ngadto  sa mga senior igo  naman  tingale.

Dinhi  naglakip  na  sa  serbisyo  sa pagkaon, sakyanan  sa  yuta,  dagat,  ug  kahanginan, sinehan  ug  uban  pa.

Gani  aduna may  mga  tindahan  og  pagkaon  nga  kun  may  kauban  sa pagkaon  ang  senior, ilakip  sa  paghatag  og  diskuwento  ang  bayranan sa tanan    niining  kauban.

Apan  ang uban  usab, kadto   rang  gikaon sa senior  mao  ray  hatagan  og  diskuwento.

Unya  may  ubang  tindahan  nga  luyo  sa ilang  kasayoran  sa balaod, usahay  maglagot pa  kun  may  senior  nga  motunol  sa senior citizen’s  ID niini.

Gani  ang  uban, sa  20  porsiyento lang  nga  diskuwento  gusto  pang  molikay  sa pagtuman  niini  kay alang  kanila  bug-at   ra  kini.

Busa  kun  bug-atan  sila  niini,  mas  labing  bug-at  kun  75  porsiyento  na  ang pangayuong  diskuwento   sa  usa ka senior  citizen.

Kun  gitan-aw  man sa ubang  mga  magbabalaod  nga   gusto nilang  muhimo  og  balaod  nga  idesenyo  alang  sa  panahon  nga  moretiro  na  sila  ug  ilang  kapahimuslan  ang   balaod  nga  ilang  giumol,  mas  maayo  pa  nga  gawas  sa  mga  pagkaon  ug  tambal, ug  uban  pang serbisyo,  mangayo  usab og  diskuwento  sa  mga  bayranan  sa    mga  materyales  alang  balay, tubig, kuryente   attorney’s  fee ug  uban  pa.