Suportahan ang nakadaog

Bisan nahuman na ang eleksiyon nagpadayon gihapon ang uban nga nagyawyaw sa resulta niini, ilabi na gyud kadtong nangapilde. Dili sila makadawat sa ilang kaparotan sa bugnong lugaynon.

Apan dili na matuis ang hukom sa katawhan. Hinuon, mahimo man nga mosang-at og protesta ang napildeng kandidato nga nagtuo nga gitikasan siya. Apan dugay ang proseso niini. Lagmit mahuman kini nga duol na usab ang sunod nga eleksiyon. Gawas niini, dako usab kini’g gasto.

Alang sa kahiusahan ug kalinaw sa komunidad nga gipuy-an, dawaton na lang sa napildeng kandidato ang nahitabo sa iyang kandidatura. Ingon man gyud niini ang eleksiyon, adunay makadaog ug siyempre may mapilde usab.

Suportahan na lang ang kandidato nga nakadaog. Kun maayo ang iyang pagdumala sa komunidad ug nagtinguha siya og kalamboan sa maong dapit, nganong ihikaw man nato kaniya ang atong pagpaluyo sa mga maayo niyang plano? Dili sayon ang pagdumala sa usa ka komunidad, nagkinahanglan kini og pagtinabangay sa usa’g-usa.

Kun ang usa ka opisyal sa komunidad nagtinguha lang sa iyang kaayohan, kana bang giingon nga ang kaugalingon interes lang ang gitan-aw, ato siyang timan-an ug sa sunod eleksiyon dili na nato siya botaran.

Apan aduna gyu’y mga kandidato karon nga nakadaog tungod sa kuwarta. Kun tan-awon baya dili sila angayan nga mahimong opisyal sa lungsod. Apan lagi, ang kadaghanan sa mga botante mahaylo gyud sa kuwarta maong nakadaog kining maong mga kandidato sa milabay nga eleksiyon.

Sa pagkakaron, ato gihapon silang paluyohan sa ilang pagka-opisyal sa komunidad. Aduna man gyu’y kaulaw ang tawo ba. Dili sa tanang panahon nga magpabaga lang gyud sila sa nawong nga bisan wala nay gusto kanila ang mga tawo mokandidato gihapon sa eleksiyon ug mogamit gihapon og kuwarta ug unsa pa dihang panikas aron pagsiguro sa pagdaog. Moabot ra gihapon nga madutlan sila sa kaulaw ug dili na magpahimong opisyal sa komunidad.

Bitaw sab ning eleksiyon, uy, madanihon gyud kaayo ngadto sa mga tawo nga gustong mokupot og gahom sa gobiyerno. Maayo lang lagi kun magtinarong sa iyang pagpangatungdanan ug pagpangalagad. Alaot man gud ang lungsod nga gialagaran og mga opisyal sa gobiyerno nga dili magtinarong sa iyang panerbisyo sa gisakpan nga dapit.