Pag-ampo aron maayo gikan sa adiksiyon sa ilimnong makahubog

Ginoong Hesus ania ako sa imong atubangan nangaliyupo ug nagasalig sa imong gahom ug gugma ngari kanako. Niduol ako uban ang dakong pagtuo ug pagsalig nga imo akong palingkawason sa kaulipnan sa ilimnong makahubog ug gikinahanglan ko uyamot ang imong tabang ug kalooy. Gidapit ko ikaw nga mosulod sa akong kasingkasing ug kalag. Hikapa ang mga nagkadaiyang bahin sa akong kinabuhi nga nagkinahanglan sa imong makatambal nga gugma labina gyud ang hinungdan sa akong pagkagumon sa ilimnong makahubog. Iiway ako sa mga tawong maoy nakagalgal kanako sa paghubog-hubog ug giyahi ako aron mahuptan ko ang kaayohan gikan sa maong pagkagumon. Hatagi ako sa kusog ug kalig-on aron akong mabuntog ang maong adiksiyon sa ilimnong makahubog sa hingpit gayud. Uban ni Jesus ug ni Maria ug sa tanang mga Santos akong ihalad kanimo ang tanan kong kinabuhi. Amen.

Gihimo nato dinhi ang pagmubo lamang sa maong pag-ampo nga atong gikutlo sa Healing Presence nga sinulat ni Maribi-Mapa-Garcia.

Hinumdomi nga ang tanan natong gipangbuhat nagasukad sa usa ka desisyon. Himoon nato ang hamtong nga desisyon kalabot sa atong kaugalingong kahimtang. Kun buot natong mamahimong palahubog nan, mapalahubog gyud kita apan kun dili, dili gyud kini mahitabo. Hinumdomi nga: “Our choices of today will determine our future!” Palayo sa mga okasyon ug mga tawo nga maoy hinungdan sa imong pagkapalahubog.