Kun maoktaba ang piniliay sa barangay

Daghan ang malipay ug daghan usab ang magguol kun maoktaba kun kahatagan og katumanan ang tinguha nga dili mahinayon ang piniliay alang sa mga barangay opisyal nga gikatakda na unta karong Oktobre niining tuiga.

Kun dili mahinayon ang barangay election daw bation og kaguol ang mga nagtinguha nga  mokandidato kay dugang lugway na man usab nga mga tuig ang ilang paaboton ug magkadako pa ilang magasto  sa ilang pagsugod og suroysuroy sa mga molupyo.

Ang malipay mao ang mga naglingkod nga barangay opisyal kay kahatagan man og dugang tuig ang ilang paghupot sa katungdanan ug makapadayon pa sila sa mga proyekto nga gitinguha nilang ipatuman.

Kun dugang proyekto nga matukod sa ilang barangay  dili lang makahatag kini og kaayohan sa ilang molupyo kun dili makadugang usab sa ilang kalig-on kay dugang pundo man nga salapi ang ilang matigom gikan sa  Standard Operating Procedure (S.0.P) nga 20 porsiyentong komisyon nga ihatag kanila sa mga kontraktor.

Malipay usab ang mga lokal opisyal nga naglakip sa konsehal, mayor, bise mayor, board member, gobernador, bise gobernador ug hangtod na ang mga kongresista nga gilad-an pa sa gasto sa ilang kandidatura sa miaging mid-term 2013 election.

Ang maong bag-o pa lang nga napili nga mga opisyal  mao man usab ang dangpan sa mga kandidato nga barangay opisyal alang sa galastohan sa ilang kandidatura nga dili usab kabalibaran kay sila man ang  lider   sa kampanya nga kinahanglan nga ilang tabangan sa pagsiguro sa kadaugan.