EDITORIAL - Ang kinawatay sud sa simbahan

Ambot  gumikan  tingale  sa kahaguka  sa  sistema  sa pagbantay  sa simbahan  hinungdan  nga  sayon  ra kaayong sudlon  sa  mga kiriwan  ug bisan  ang  mga  santos  o imahe  nga  ampoanan  himulbolan pa  sa alahas.

Unya  gawas  sa  mga  security  guard  nga  kompiyansa  usab  kaayo,  ang  mga  santos  o rebulto mismo  nga  anaa  sa sulod  kalmado  kaayo  nga  di  makasanta  sa  mga  pilit  og  kamot.

Pastilan,  di baya  mahadlok  ang  mga  kawatan  nga  unta  ang  sud  sa simbahan  mga sagrado  mang   butang.

Ang  kuwarta  nga amot sa  mga  membro  sa simbahan, sagrado  kay  may bendisyon  sa pari  ug  labaw  sa tanan  ang  mga larawan  o  rebulto  nga  maoy  gisimba  sa katawhan  gamhanan.

Mao  nga wa  lang  hibaw-i  nga  ang  mangiriw  sa  mga  butang  sama sa kuwarta, mga mahalong  alahas  sa santos, ug  usahay  mismo  ang  mga  dapat  sa lawas  sa rebulto sama  sa  bukton, ulo  nga  ginama  sa bulawan  o  gold, kun  buhi  pa  ba  sila  karon.

Nagsalig  kining  mga  tawhana  kay  maayo  kaayo  og  kinaiya  ang  mga  santos nga  di  dayon  dihadiha  mobawos  ug  mosilot  kanila. Kay  kun  pareho  pa  sa tawo  og  kinaiya  ang  mga  rebulto, aw daghan  nang  mga kiriwan  nga  napusilan, nalubaan, napriso o kaha napatyan.

Unya  ang  nakapait  kay  wa may  madakpan  kay  bisan  dugay  na nga  nasayran  ang  ka –epektibo sa CCTV  camera  pag-ila  sa  mga  kawatan  nga  mangiriw,  ang  mga  nagdumala  sa simbahan  di man  mogamit  niini.

Kun  gigamit  man  apan wa  ipunting  sa   mga  dapit  nga  anaa  ang  kawatonon  sama  sa Redemptorist  nga  matud  pa gilihay  gikan  kang  Senior Sto. Niño  ang  mga camera  busa  gihimulbolan  kini  sa iyang  mga  alahas.

Kadtong kawat  sa P100,000 sud  sa San Pedro Calungsod Chapel  sa SRP namingaw  lang  ug  usab  kadtong  nangawat  sa  mga  kuwarta  ug  mga  alahas  gihapon  sa Birhen  sa Regla sa simbahan  sa Opon, wa nay balita.

Hinuon  mga  biya  naman  ang  maong  mga  butang  sa  mga  nagdonar  niini  apan  sakit  baya  palandungon  nga  nahitabo  kini  gumikan  sa negligence  o kadanghag  sa mga gipiyalang  nagbantay  sa simbahan.

Ang  nakaayo  lang kay  daghan kaayong  mga  Katoliko  nga malumo  og  kasingkasing  nga  maoy  modayandayan og mahalong mga alahas  sa  mga  rebulto  nga maoy  giampo  kanunay  sa mga kawatan  nga  unta  kini  magpadayon  aron  aduna  silay  makiriw.