Sa pagpanglingkod sa katungdanan sa tanang mananaug sa miaging 2013 mid-term election, ang katawhang Pilipinhon sa gihapon mopabalik na usab sa pagpakigbugno sa kanunay nga naghamok nga kalisod.
Dili ikalimod nga ang kalisod sa kahimtang sa katawhang Pilipinhon daw na taligam-an lamang sa mabuot nga katilingban sa milabay nga mga adlaw tungod kay ang tanan didto man masentro ang dakong pagtagad sa miaging bugnong politikanhon.
Sa panahon sa kampanya sa mga nagpapili sa miaging piniliay maoy atong mabati ang tambok nga kalauman sa kadaghanan alang sa kauswagan sa ekonomikanhong kahimtang sa katawhan.
Matud pa nila nga gipasiatab na sa atong kagamhanan sa nasud ang kalamboan nga naangkon dinhi sa nasud nga maoy hinungdan nga nagkinahanglan pa kini og dugang pinili nga mga opisyal nga mahimong kaabag ug dili mobabag.
Ang nakapait lamang kay taliwala sa gipasiatab nga kalamboan sa ekonomikanhong kahimtang sa nasud sa gihapon nagpabilin man ang katawhan sa ilang kahimtang nga daw gikaluhaan na daan og kalisod.
Nakita kining maong kahimtang dili lang sa Pilipinas kun dili hangtod na ngadto sa lainlaing nasud sa tibuok kalibutan nga maoy nakaaghat sa inilang financial adviser ug inilang TV host sa nasud sa Amerika sa tuyo nga katudloan ang mga Pilipino sa mga sekreto kun unsaon sa pagtagamtam sa kalamboan nga gipasiatab sa goberno.
Dinhi sa Sugbo si Orman unang miatubang sa gatusan ka mga Sugboanon sa Waterfront Cebu diin iyang gipasabot ang mga pamaagi sa pag-angkon sa mga kahigayonan sa kalamboan nga gipasiatab sa kagamhanan.