EDITORYAL - Ang Catholic Vote di na angay hisgotan

Milabay  na ang  election, ug  kun aduna  may  gipaila  ang  mga kaparian  nga  Catholic vote , di kini big deal  nga  angay  pang  kulitugon aron  pakauwawan  ang  mga  pari.

Kun   himoon  kining  sumsoman  sa  mga kandidato  sa Team  Patay  kinsa  midaog   sa miaging  election, tataw  kaayo   nga   insulto  nga  makapahiubos  sa mga kaparian  nga  maoy  nagpasiugda  sa maong   isyu.

Sa  pagkatinuod, mikabat  sa 52 milyones  ang  botante  sa Pilipinas  ug  70  porsento  niini  mao  ray  mibotar, sumala  sa Comelec,  nga  nagkahulogan  nga  anaa  ra  sa mga  27 ngadto  sa 28 milyones  ang  tanang  nakabotar.

Kun  sa maong  gidaghanon   7 milyones  ang  di  mga  Katoliko,  nagkahulogan  nga  anaa  sa di mominus  20 milyones  ang  Catholic  vote,  kun kana  natuman  pa  unta.

Sa maong  gidaghanon  kun  nagkahiusa  pa  ang  mga  Katoliko,  sayon  ra kaayo  kining   makamontar   og  kaugalingon  niyang  Presidente  ug  mga senador  sa nasud.

Apan  ang  peligro  lang  kun  mapareha   sa panahon  sa  mga  Katsila  nga  kumo  kay under de bunal  sa  mga  pari nga  Katsila  ang  mga  opisyal  sa goberno  kaniadto,  mura  sila  og  kabayo  nga  girendahan  kansang  lihok nag-agad  sa mandar  sa  mga pari.

Apan  karon  lain na  ang  mga Filipino  kinsa  human  masugamak  sa Kinatsila  nga  panggoberno  ug  nakakat-on  na  sa demokratikanhong sistema  sa pangagamhanan,  di  na  karendahan  ang  maong mga  lider.

Gani  gimugna  ang  balaod  bahin  sa pagbuwag  sa simbahan  ug  sa estado  diin  nagpasabot  nga  kun  lider  ka sa simbahan  ayaw  panginlabot  sa mga  trabaho  sa  mga  lider  sa goberno.

Sa samang  higayon  kun  lider  ka  sa goberno  ayaw  panghilabot  sa  mga  trabaho  sa  mga  lider  relihiyoso.

Ang isyu bahin  sa Catholic vote, usa  ka pagsukod sa  kaparian  kun  ang  tanang  Katoliko,  may respeto  ba  sa  gisugo  sa Dios   sa Iyang  mga  tinuod  nga  mga  anak,  nga gusto  Niya  nga  anaa  kini  sa panaghiusa  ilabi  na  sa pagkanaog  og  desisyon  o hukom sama  sa pagboto,  kay  gihigugma  Niya  ang  panaghiusa  ug  gidumtan  Niya  ang  pagka-bahinbahin, base sa mabasa  sa Biblia. Ug  ang  maong  sugo  sayon  ra kaayong  gituman  sa mga  tawong  may kahadlok  sa Dios  ug  nag-alagad  sa buhi  ug  matuod  nga  Dios   pinaagi  sa  pagtahud  sa  awhag   sa   lider  nga  nanguna  kanila.