Pastilan luyo sa makapakutas nga pangulitawo sa mga botante, duha ray padulngan sa mga kandidato ug tataw nga matagamtaman na nila kini karong adlawa, ang kalipay ug ang kaguol.
Sa modaug, aw klaro kaayo nga maghingaphingap kini sa kalipay, samtang sa mapildi, aw di usab tiaw ang bation niining kaguol, kalaay, ug ang kahigwaos.
Kining kahigwaos mao kini ang panagsagol sa kaguol, ug kasakit nga magda og kahiubos sa iyang isigkaingon ilabi na kun suod niya nga higala o kaha paryente apan iyang masayran nga wa mobotar kaniya.
Unya sa iyang kalagot ug kapungot, iya dumtan sa hilom ang maong tawo ug maoy han-ukan niya sa pagtuo nga ang wa pagbotar niini kaniya maoy nakapadimalas sa iyang kandidatora .
Busa sud sa pipila ka buwan magpabilin pa niyang tagamtamon ang ugtas ug may uban nga di kaayo anad og dakong problema, makasagubang gyud og paghigos gumikan sa konsimisyon.
Apan di angay nga bugal-bugalan ang atong mga igsoon nga dimalason sa election.
Ang makapalagot gyud tinuod mao ang mga botante nga maayo kaayong mobulatik,
Sa dihang gipalala og bino, gitunolan og sigarilyo, aw puwerting kusogang miabiba ug mipadasig sa usa ka kandidato nga tabangan niya sa kampanya niini aron modaug. Apan pag-abot sa adlaw sa election, gitunolan kini og subre sa pikas kandidato, nausab na ang dagan sa hunahuna ug sayon kaayong nakalimtan kadtong kandidato nga igo lang mipainom , mipakaon o kaha mitunol kaniya og yusi.
Pastilan kaayo bayang isinggit ug idanguyngoy kun mahitabo nga ikaw nga mi-entra niining politika mao pay pag-ingnon sa uban mabaw ra og lubot.
Paita ilabi na kun ang kaugalingon nimong kuwarta naamong kay imong gipanghatag sa mga botante nga gituohan nimong mobotar kaniya unya mahibaw-an na lang nimo nga didto diay mosuporta sa imong kaatbang.
Hesus kasakit baya, apan hinuon ang tawong politiko una mosud sa politika giandam na niya ang kaugalingon nga bisan unsay moabot kaniya, dimalas man o kaha debuenas, andam siyang modawat sa iyang kapalaran.