Murag di katuohan apan mas labing di kita makatuo nga ang mga sakop sa intelligence group sa kapolisan magtumotumo.
Kun tinuod kining nasayran sa maong grupo nga may mayor dinhi sa lalawigan nga mipapuyo sa ilado nga grupo sa mga tulisan nga gikan sa Mindanao, aw delikado ug peligro kaayo ang maong matang opisyal sa kagamhanan.
Gani di makatuo ang publiko nga may opisyal pa sa goberno ang mosalmot sa trabaho sa mga tulisan karong panahona.
Ang panultihon nga “birds of the same feather flock together†usa ka pagtulon-an nga di matuis ug di malalis.
Nagkahulogan kini nga ang usa tawo ilabi na kun opisyal sa goberno nga may delikadesa kansang prinsipyo ug baruganan supak sa mga buhat nga dautan ilabi na sa pagpanulis, aw imbis makigsuod sa mga tulisan mao pa kini mangita og paagi aron hidakpan sa mga otoridad ang maong pundok.
Apan imbis iyang abugon, iya na hinuon kining gisagop pinaagi sa pagpapuyo niini sa iyang balay o resthouse, di kalikayan ang publiko nga abuton og pagduda ug katahap nga ang maong mayor kalambigit o kauban sa maong grupo.
Di ba dako kaayong sagpa sa iyang dagway nga imbis kaabag siya sa mga kapolisan pagprotiher sa publiko batok sa mga tawong dautan, tua na hinuon siya mopabor ug modapig ning maong mga tawo nga gukdunon sa balaod kay mapanamastamason sa ilang isigkatawo.
Wa ba niya hunahunaa ang kadako sa kadaot nga ikadulot niining mga tulisan ngadto sa katilingban?, ngadto sa natad sa ekonomiya? Sa kinabuhi ug kabtangan?
Apan ngano nga nakahimo siya sa pagpakig-abin sa maong mga matang sa mga tawo kansang kinaiya gawas sa pagkataspokan, manghilabot pa sa kabtangan sa mga kugihan ug mohunos pa’g kinabuhi aron lamang may ikapakaon sa ilang pamilya.
Kamakaluluoy baya sa asawa ug mga anak niining mga tawhana nga gibuhi sa kinitaan nila sa panulis imbis kinitaan gikan sa tinarong nga panarbaho o kaha kinabus nga pamatigayon.
Sa laing bahin ang mayor nga misagop niini, angay kondenahon ug isalikway sa katawhan, kay usa kini ka mayor nga tulisan.