Ang mga panultihon sa panahon sa eleksiyon

Ang mga hunahuna nga gipadayag dinhi iya ra sa tagsulat ug walay labot ang Banat News ug mga sakop niini.

Sa panahon sa  piniliay maoy sagad nga mabati ang nagkadaiyang panultihon nga naglambigit sa mga politikanhong kalihokan nga nagtinguha sa pagsiguro sa ilang kadaugan pinaagi sa pagpamintaha sa ilang mga kaatbang.

Ang panultihon nga “koprasa ang kuwarta” nga nagpasabot nga ang politiko nga adunahan sa pagkabig nga botohan iyang kandidatura maoy himoon ang pagpamalit og boto pinaagi sa pagpanghatag og kuwarta ngadto sa mga botante.

Ang kaatbang nga kandidato nga walay ikahatag nga kuwarta maoy itugbang nga tubag sa ilang pagpangampanya ang pag-awhag sa mga tawo nga dawata ang kuwarta nga ihatag  sa ilang kaatbang nga kandidato apan maoy sunda sa inyong pagboto ang gimando sa inyong konsensiya nga sa ato pa “koprasa ilang kuwarta.”

Dugang panultihon sa panahon sa eleksiyon  nga mabati gikan sa mga poltiko mao nga  “tukba ang paon apan iluwa ang taga.” Nagpasabot gihapon kini sa mga kandidato nga namalit og boto pinaagi sa paghatag og kuwarta ngadto sa mga tawo apan ang mga kaatbang nga kandidato maoy ilang itugbang nga kampanya ang pag-ingon nga dawata ang kuwarta nga nagsilbing paon apan ayaw sunda ang gimando sa politiko nga botohan iyang kandidatura.

Kini maoy labing kuyaw nga gihimong sanglitanan nga tukbon ang paon apan iluwa ang taga kay kun masipyat nga madala gayod sa pagtukob ang taga kuyaw nga dili na makaugpo ang mga botante  nga malakip ilang konsensiya sa pagkakuha.

Ang “moduga pay unas”  lain usab nga panultihon sa panahon sa piniliay nga naghulagway sa politikong tihik sama usab sa lawom og bulsa  apan mobo og kamot nga ang politikong hingtungdan  maglisod sa pagkuot.