EDITORYAL - Gipakusgan na sa NASA ang pagdiskobre sa Mars

Human  madiskobre  sa tawo  ang  Moon  kon  buwan, naglaraw  na  usab  kining  patumban  og  tawo ang   Mars  aron  sutaon  kun  mabuhi  ba  ang  tawo  didto  sa maong planeta.

Sa  buwan  nasuta  na  nga puwede  kining  kapuy-an  og  tawo  kay  may  tubig,  ug  ang  klima  didto susama  ra  usab  sa Earth  kun kalibotan  nga  atong  gipuy-an  karon  nga sakar  kaayong  puy-an  sa  mga butang  nga  may  kinabuhi.

Wa  lang masuta  kun  ang  buwan  may  dagat  ba, apan  kumo  kay  napamatud-an  na  sa  mga  scientist  nga  puwedeng  mabuhi  ang tawo didto,  aw , wa  kini  problema  oi.

Ilabi  na  kun  padad-an  kini  og  mga  politiko  nga  Filipino, Hesus, pinaagi  sa  mga  saad  ug  pasalig, dali ra kaayong  kahimoan  og  dagat  ang  maong  lugar. Kun  way  sapa, aw  maghimo  og  sapa,  kun way  taytayan,  aw  maghimo  og taytayan,  kun  way  karsada,  maghimo  og  karsada.

Sa  laktud  sa  kabatid  na  sa tawo  dinhi  sa kalibotan,  sayon  na lang  kaayong  i-apply  kining  maong  mga  kahibawo   kun  ugaling  mamalhin  ngadto  sa  buwan  sa umaabot  nga  panahon.

Ang  unang  dad-on  ngadto  mao  ang  mga  enhinyero  sa  highway,  mga  water  expert, batid  sa elektrisidad,  mga  negosyante  og  hardware, lumber ug tanang  mga  tawo  sa Earth  nga  may  skill, talent, ug abilidad sa nagkalainlaing  matang  sa   serbisyo  nga may  labot  sa kinabuhi  ug  panginabuhi  aron  mopuyo  ang  tawo didto  sa  buwan nga  sama ra gihapon  dinhi  sa kalibotan.

Sa  madugay  ug  sa madali, passport  na lay  kinahanglanon  sa tawo  aron  makabiyahe-biyahe  kini  tali  sa kalibotan  ug  sa buwan  pila  ka tuig  gikan  karon.

Inigkapuno  na sa  buwan,  may  Mars  na  usab  nga  angay  usab  puy-an  kun  gikinahanglan,  ug  kining  tanang   pangandoy  makab-ot  ra kini  sa tawo tungod  sa kangilngig  na  karon  og  utok  sa tawo.

Gani  gumikan  sa ka-bright  sa tawo,  di na kini motuo  og Dios ug gani nagtuo  na  kini  nga  nalabwan  na  niya  ang Dios  nga  naghimo  kaniya,  nagtukod  sa kalibotan  ug  sa  tanang  mga  planeta  sama  sa buwan,  adlaw, Mars,  ug  uban  planeta  sud  sa uniberso.

Wa  siya  magpakabana  nga   daoban  sa Dios  kining  kalibotan  ug tanang  mga  butang  sud  sa uniberso  sa adlaw sa paghukom, uban  sa way  katapusang  ulbo  sa kayo, ang  mga  tawong  wa  mag-alagad sa matuod nga Dios samtang  buhi  pa sila  sa kalibotan, molangoy-langoy   didto  nga  wa nay kamatayon.