Ang atong Family Code adunay gilatid nga mga grounds nga mamahimo nimong kabasihan alang sa pagpa-annul sa kaminyuon. Kun ang magtiayon nagbuwag na sud sa taas nga higayon o ang bana mi abandon sa iyang asawa ug mga anak sud na sa pipila ka tuig, mamahimo ba kana nga gamitong grounds alang sa annulment of marriage? Kana nga pangutana ang atong tubagon karon sa atong column.
Dear Atty. Divine,
Good day! Maam duna lang unta koy pangutana bahin sa akong problema sa akong husband. Wala na siya magpakita nako sulod sa tulo na ka tuig ang nilabay. Pwede ba mapawalang bisa ang among kasal?Unsa man ang akong buhaton?Pwedi ba ko makaminyo adto sa laing nasod?Maam naglibog ko kay naa man gud koy karelasyon karon nga tua sa gawas sa nasud unya nag plano siya nga paadtoon ko niya didto. Pwede ba ko moadto ug di ba ko maglisod tungod sa akong status?
Daghang salamat sa imong pagbasa sa akong sulat, nanghinaot ko sa imong legal nga tambag. Matinahoron.
— Mayet
* * *
Dear Mayet,
Kun ang imong bana wa na magpakita kanimo sud sa tulo ka tuig o nagbuwag na kamo sud sa pipila ka tuig, wa kana magpasabot nga lig-on na kini nimong kapasikaran sa pagpa-annul sa inyong kaminyuon. Kun gusto kang mopasaka og annulment sa inyong kaminyuon mas maayo nga moadto ka og abogado aron ma-evaluate ang imong kaso ug matun-an kun unsay mamahimong basihan kon grounds sa imong ipasaka unya nga Petition for Annulment of Marriage basi sa nalatid sa atong balaod. Medyo strikto ang Korte Suprema sa mga grounds sa Annulment apan ang mga huwes mao nay motimbang-timbang sa mga ebidensya nga ipresentar sa petitioner kun angayan bang itugot ang annulment sa inyong kaminyuon. Busa kining grounds nga imong gihisgutan sa unahan sama sa abandonment ug uban pa, nagkinahanglan pa kana og lig-ong ebedensya nga imong ipresentar sa korte aron pagkombinser sa hukmanan. Samtang sa lain nimong pangutana, kun aduna kay karelasyon karon nga atua sa gawas sa nasud maglisud ka sa pagminyo kaniya tungod sa imong status kay inigkuha unya nimo og requirements alang sa inyong pagpakasal ngadto mosango ka sa imong record sa National Statistics Office kon NSO kay mo-appear man na didto nga minyo ka inigkuha nimo og Certificate of no marriage kon Cenomar. Kun paadtuon ka sa imong boyfriend sa gawas sa nasud, mamahimo man nga mo-adto ka as tourist apan dili ka mamahimo nga ipetition sa imong boyfriend alang sa pagkuha og fiancée visa tungod sa imong status kay mangayo man unya na sila og Cenomar gikan sa NSO. Ang maayo nimong buhaton karon, mao ang pagbisita og abogado aron iyang ma-evaluate ang imong kaso alang sa imong planong pagpa-annul sa imong kaminyuon ug kun gusto ka nga molarga sa gawas sa nasud mamahimo sab ka nga moadto as tourist. Hinaut nga akong natubag ang imong mga pangutana. Daghang Salamat and God Bless.
— Atty. Divine
* * *
Alang sa inyong pangutana, ipadala lang sa Legal Corner sa Banat News sa V. Gullas Street, Cebu City or email sa flores_divina@yahoo.com. ug akong tubagon ang inyong pangutana pinaagi sa akong column matag adlaw’ng Miyerkules ug Domingo.