Ko-Ko-Koprasa

Kun sama nako nagtuo ka nga wa tay mahimo batok sa pinalitay og boto sa piniliay sunod semana, ug kun sama nako nagtuo sab ka nga ang gihimo sa nagpakabana nga mga pundok mao ra ang naandan nga mga kampanya nga nasuwayan na apan napakyas pagbadlong sa pinalitay og boto sa nangaging mga piniliay, malipayon kong motaho nimo nga pulos ta sayop.

Nahinangop kong nakadawat ko og text gikan sa suod nakong higala, ang bantogang si Johnny Kawa, ang usa sa nag-agak nako dihang nagsugod pa sa radyo, nga duna siyay kanta nga gipanghinaot nga makatabang sa pagbaraw sa naandan nga pagbaha sa kuwarta sa bisperas ug sa adlaw sa piniliay.

* * *

Siaw ang lyrics sa kanta nga produksiyon sa Ditan Communications  (Caesar Ditan ang tinuod ngan ni Kawa) uban sa arrangement ni Joey Cabusas. Nidason sa kampanya batok sa pinalitay og boto sa karaang Sugbo, “Kan-a ang Paon, Iluwa ang Taga.” Sa usa ka pung “koprason” ang suburno sa kurakot nga mga politiko.

Matud ni Kawa iapil unta niya sa lyrics ang iyang sugyot nga sulbad. Apan nabalaka siya nga masaypan nga nagwali. Pagka karon giisip niyang igo na ang pagpahibawo sa mga botante, labi na sa masa nga maoy gitumong sa alegre nga lyrics ug tuno sa kanta, nga di sila inutil batok sa naghitak nga pinalitay sa boto.

* * *

Gipahaom ni Kawa ang iyang lyrics sa karaang kanta sa Espanya, “La Cucaracha,” nga nabantog atol sa rebolusyon sa Mexico. Ang orihinal nga kanta nasentro sa uk-ok nga nagtakiang kay nawad-an og usa ka tiil. Niang lyrics sa “Ko-Ko-Koprasa!”

Chorus 1:

Ko-ko-koprasa! Ko-ko-koprasa!

Wa'g tuo atong grasya

Da-da-dawata ang ilang kwarta

Palit bugas ugma puhon!

I.

Nangadlawn intawn si Manoy

Layo baya iyang baktason

Kay ang pondo sa taytayan

Sa senador nasungkaban!

Chorus 2:

Ko-ko-koprasa! Ko-ko-koprasa!

Wa'g tu-o atong grasya

Da-da-dawata ang ilang kwarta

Palit tuba ugma puhon!

II.

Nagbaguod intawn si Misis

Bug-at baya ang labhanan

Kay ang pondo sa pa-tubig

Gui-lamoy ni congressman!

III.

Padung ciudad na sad si Inday

Magpa check-up sa doktor

Ang tambalanan sa iskina

Gui-rema-te sa mayor

Chorus 3:

Ko-ko-koprasa! Ko-ko-koprasa!

Wa'g tu-o atong grasya

Da-da-dawata ang ilang kwarta

Palit ug load ugma puhon!

(Kun ganahan kang maminaw sa kinatibuk-ang kanta, palihug paminaw sa "Arangkada" sa DYAB 1512 kHz.)

* * *

Email: [email protected]