Nagtinudloay na ang mga nalambigit sa pagkamatay sa gidudahang shoplifter sa Gaisano Metro Colon.
Una si Jeffrey Aquino ang CCTV camera operator sa nahisgotang tindahan mitudlo kang Mauricio Doblados ilang in-house security supervisor ug kaubang security nga si Wendyl Boyles nga maoy nakapatay sa biktima nga si Mario Alfie Ducayag.
Apan sa iyang pamahayag sa National Bureau of Investigation (NBI) gibarogan ni Boyles nga si Jeffrey Aquino gayod ang nakapatay sa biktima nga si Ducayag. Hangtod ning akong pagsuwat wala pa mopakita sa buhatan sa NBI si Doblados aron mopaabot sa iyang habig sa hitabo.
Human buhii sa mga police dihang gidakop wala na magpakita si Jeffrey Aquino. Si Aquino gibuhian tungod sa pagbabag sa kabanay sa biktima nga siya dakpon tungod kay siya mao ang ilang saksi sa kamatayon ni Ducayag apan dili na siya makit-an niining panahona. Kun hain man siya karon si Jeffrey Aquino ra ang nasayod.
Sa atong pagsunod sa kaso klaro kaayo nga adunay namatay ug nakapatay. Sa pagka karon klaro kaayo nga namatay gayod ang biktima nga si Mario Alfie Ducayag. Klaro usab kaayo nga adunay nakapatay ug ang gidudahang nakapatay mao sila si Doblados, Aquino ug Boyles. Ang dili lang klaro sa pagka karon kun kang kinsang sumbag ug patid sa tulo ang nakapatay sa biktima.
Kun aduna may makapaklaro sa hanap pang kamatooran kana mao ra gayod ang pagbista sa kaso busa giawhag nako ang National Bureau of Investigation sa pagpasaka og kaso sa tulo ug sa lain pang mailhan nga adunay kamot sa pagkamatay ni Ducayag aron masugdan na ang pagbista sa kaso.
Kun imong tutokan ug sabton mahulma sa imong huna-huna nga nagkonsabo ug nagkasabot ang huna-huna sa tulo nga gipasanginlang nakapatay sa biktima . Dinhi puwede nga ma-advance sa mga imbestigador sa NBI ang conspiracy.
Sa teyoriya nga conspiracy wala kinahanglana nga adunay unang panagsabot sa paghimo sa krimin. Ang gikinahanglan lang mao nga nagkatukma ang huna-huna sa mga gipasanginlan sa ilang gustong himoon ngadto sa biktima bisan diha na mismo sa paghimo sa krimin.
Sa conspiracy, the act of one is the act of all busa walay makalingkawas sa tulo sa salaud nga ilang nahimo kun kini ang maprobar ug mapabarog sa hukmanan. Dinhi ang tinudloay sa tulo magamit pang ebidensiya batok kanila.