Kinsa ba gayod ang tinuod nga mapilde sa eleksiyon?

Ang mga tawo ilabi na gayod kadtong mga botante sa nasod nga Pilipinhon maghangap-hangap ug mahinangop kun adunay eleksiyon. Nganong naingon  niini nga kun buot hunahunaon dako man ang magasto sa kuwarta sa gobiyerno sa pagpahigayon og eleksiyon?

Bisa’g ang ubang kandidato dili kasaligan ug mga bakakon, apan ang mga Pilipino magmalipayon gihapon nga maghisgot-hisgot sa eleksiyon ilabi na kun adunay dapigan nga kandidato. Ingon niini ang mentalidad sa mga Pilipino. Ganahan kaayo nga maghisgot bahin sa eleksiyon. Kabahin na sa kinabuhi sa mga Pilipino ang eleksiyon. Malingaw ang mga Pilipino nga maminaw sa mga atake sa pagsaway sa matag kandidato.

Mahimuot ang mga Pilipino nga maminaw sa mga komentarista sa radyo ug telebisyon nga magtuki sa pagkatawo sa matag kandidato. Dili kay kini lang ang mga tawo naghinam-hinam nga makakuwarta na sab sila kay eleksiyon na man usab. Anaa man gayoy daghang kuwarta nga makuha sa mga botante gikan sa mga kandidato, ilabi na kadtong mga botante nga hilig og kopras. Modawat sa kuwarta sa mga kandidato sa pikas ug pikas nga partido apan ang botaran mao kadtong mga kandidato nga naayonan bisa’g wala manghatag og kuwarta.

Apan sa resulta sa eleksiyon, ang nakadaug mao gayod kadtong mga kandidato nga mibuhig kuwarta nga dinagko aron pagdani sa mga botante. Bisa’g dili angayan nga makadaug ug himuong opisyal sa komunidad, apan nakadaug gihapon tungod sa salapi.

Ang angayan ug tarong nga mga kandidato napilde tungod kay wala’y kuwarta. Pastilan, kinsay tinuod nga napilde? Ang mga kandidato ba nga tarong ug angayan o ang mga tawo sa komunidad?

Unsay makuhang kaayohan ug kalamboan sa usa ka komunidad nga ang mga opisyal nga naglingkod dili kasaligan ug dili angayan kay maayong mangawkaw sa kuwarta sa lungsod? Wala gayod. Aduna na untay angayan ug tarong nga mga tawo nga himuong opisyal sa lungsod apan nangapilde kay walay kuwarta. Panahon na unta nga ang lungsod makabaton og mga opisyal nga tinuod gayod nga nagmahal sa maong lugar, apan gisalikway sa mga botante kay walay kuwarta nga gipanghatag. Apan dili sila ang tinuod nga napilde, kun dili ang mga tawo sa maong komunidad ang tinuod nga napilde sa eleksiyon.