Angay'ng ikabalaka sa mga labor unions sa nasud ang gidangatan sa mga gitaktak nga trabahante sa Digitel.
Kini tungod kay ang nahitabo sa 300 ka mga kawani nga gitaktak sa trabaho mamahimong panag-ingnan sa uban nga mga abusadong kompaniya.
Kini kun mapakyas ang atong gobyerno pagsiguro nga mapatuman ang kamanduan sa Korte Suprema.
Ang taas nga hukmanan miluwat na og disisyon nga nagdeklarar nga illegal ang gihimong pagtangtang sa trabaho sa mga kawani ug mimando sa Digitel nga karon napalit na sa Smart ug PLDT pagdawat pagbalik sa trabaho sa maong mga kawani ug pagsunod sa gimbut-an sa ilang Collective Bargaining Agreement uban sa union.
Apan taliwa sa disisyon sa korte nagmagahi ang management sa Digitel pagsunod niini.
Kun pasagdan nga ang mga gamhanan ug impluwensiyadong mga negosyante lantaran nga mosupak sa kamanduan sa Korte, unsay kaugmaon nga nagpaabot sa labor sector sa Pilipinas?
Busa angayang ayudahan sa mga dagkong kapunongan sa pamuo dinhi sa nasud ang mga kawani sa Digitel.
Tungod kay dili lang ang ilang kaugmaon ug sa ilang pamilya ang nahulga niining gihimo sa Digitel kun dili lakip ang kaugmaon sa tanang mga mamumuo.
* * *
Usa ka semana gikan karon mao na ang eleksiyon. Samtang nag-anam ka duol ang piniliay nag-anam sab kainit ang kampanya.
Nisamot ang sinabligay og lapok sa mga ribal nga kandidato. Nisamot sab kalawom ang mga kasayuran nga nanggawas batok sa pipila ka mga kandidato labi pa kadtong gilantaw nga lig-on nga kandidato pagka presidente sa 2016.
Ang mga kandidato pagkasenador nga nag-una sa mga surveys nag-iyahay og paningkamot dili lang aron pagsustinir sa iyang rating kun dili aron pagbunlot paubos sa iyang kauban.
Ang giilogan, tataw nga gustong mamahimong numero uno aron dako ang purohan nga mapili nga kandidato pagkapresidente o ba kaha bise presidente.
Gawas niini nag-apas sa pagbaha sa suporta sa mga negosyante nga mohatag og pundo atol unya sa kampanya.
* * *