Dili patas ang katungod sa usa ka legitimate ug illegitimate nga anak ilabi na kun maghisgot ka og kabilin nga mamahimo nilang masunod sa ilang mga ginikanan. Apan ang atong balaod adunay paagi aron mamahimong legitimate nga anak ang usa ka illegitimate child. Unsay angayang buhaton niini? Kana nga pangutana ang atong tubagon karon.
Dear Atty. Divine,
Mangutana lang unta ko labot sa sitwasyon sa akong anak sa pagkadalaga nga karon five (5) years old na. Kining akong anak naggamit sa apelyido sa iyang amahan nga kanhi nako boyfriend. Apan niadtong miaging tuig naminyo ko ug gusto unta sa akong bana nga mo adopt sa akong anak aron mausab ang iyang apelyido ug mamahimo siyang legitimate child? Unsa may among buhaton? Mamahimo ba kini niyang ma adopt ang bata bisan kun di na mi mananghid sa iyang amahan kay wa man sab siya magsuporta aning bataa? Hinaut nga imong matubag ang akong pangutana. Daghang salamat.
—Jenny S.
Dear Jenny,
Salamat sa imong pangutana. Mamahimo nga sagupon sa imong bana ang imong illegitimate nga anak apan basi sa atong balaod nga nalatid sa Domestic Adoption Act of 1998 kini nagkinahanglan gyud og consent kon pagtugot sa iyang biological father. Aron sab nga mamahimo gyung legitimate ang status sa imong anak mas maayo nga kamo gyung duha sa imong bana ang mosagop kaniya kay ang epekto man gud sa adoption ang bata mamahimong legitimate nga anak sa mga tawo nga misagop kaniya ug entitled na siya sa tanang katungod sa usa ka legitimate nga anak, so at least di maglibog ang bata sa iyang status inig dako niya. Kun mangayo mo og pagtugot sa amahan sa bata, I don’t think nga mosupak pa siya niini considering nga wa man gyud gani siya magsuporta sa bata. Busa ang maayo ninyong buhaton karon mao ang pag-adto og abogado aron inyong maandam ang Petition alang sa pagsagop sa bata kay kinahanglan man kini nga i-file sa Korte ug aduna say hearing nga mahitabo. Lain ninyong buhaton karon mao ang pagpangayo og consent o pagtugot sa biological father sa bata aron segurado gyud nga maaprobahan sa Korte ang inyong adoption. Hinaut nga akong natubag ang imong pangutana. Thanks and God Bless— Atty. Divine
Alang sa inyong pangutana, ipadala lang sa Legal Corner sa Banat News or email sa flores_divina@yahoo.com. ug akong tubagon ang inyong pangutana matag adlaw’ng Miyerkules ug Domingo pinaagi sa akong column.