EDITORYAL - Politiko mobayad og security tax sa NPA?

Mahimong  tinuod  kini  tungod kay una  sa tanan nag-agap  og boto  ang  usa  ka kandidato,  ikaduha sayon  ra kaayo  nila  kay  kuwartahan  sila, ikatulo mao  kini  panginabuhi  sa mga rebelde  nga  ibuhi  sa ilang  pamilya.

Ingon  niini  ka ngil-ad  ang  dungog  sa  mga  rebelde  nga  murag  gihimo  lang hapin  ang  ilang  pagka-NPA  apan  ang tinuod mas labaw  pa sila sa ordinaryong  tulisan kay ilang gihimong   gatasan  ang mga politiko.

Di man nato  sila  mapugngan  tungod  kay ingon  na  niana  ang  dagan  sa ilang  utok  ug  hunahuna.

Sa pagkatinuod  kun  tawo  ka  nga may delikadesa  ug  patuohon  nimo  ang  tawo   nga maayo  ang  imong tinguha  sa  pagpakigbatok  sa  gobiyerno  kay  gusto  ka  nga  ang inyong  grupo  maoy  mopuli, ingon  ba  niana kalimpyo  ang  imong  panginabuhi  aron  tuohan  ka  sa mga tawo  nga tinarong  ang  imong  tuyo?

Ang pagpakaon  nimo  sa imong  pamilya  nianang  isuhol kanimo  sa inyong  labaw  nga  kinilkilan  gikan  sa  mga  politiko, mga dagkong  negosyante, ug  sa kabus  mismo  nga  mga  mag-uuma  angay  kana  nga  ikauwaw  nimo  sa publiko.

Kay  ang  pagpangilkil  sama  ra  panulis ug pangawat  nga  maoy  daling  masagop  sa  mga  tawong  tapolan nga di  gustong  motrabaho  sa tinarong  nga trabaho  kay  kapuyan  sa gamay  ra nga suweldo.

Busa  kay tapolan, aron mabuhi  ang  pamilya  mosud na lang  sa  mga binuang  aron  masalbar  sa  kagutom  ang  asawa  ug  mga anak.

Kay  unsa  ba gyuy  kalauman   sa  mga  rebelde bahin  sa ilang  kawsa pag-ilog  sa renda  sa panggoberno  sa nasud?

Kining  pundoka  nasayud  nga wa silay  mahimo  tungod  kay  una  nimo mailog  ang  pangagamhanan  dinhi  mag-agi  una  og  proseso sama sa election.

Kun imong  ipaagi  sa pinatyanay , unsa  may  imong  dag-anan  batok  sa kahimanan  ug pasilidad  sa goberno  nga  kompleto  man  kini  og  puwersa sama  sa  mga  polis  ug  sundawo  ug  mga  kasangkapan  sa gubat.

Busa  ang  pagsud  sa usa ka tawo  nianang  pundok  sa mga  rebelde, usa  ka  lakang  nga  makig-unay  ra ka  og  pinatyanay  sa imong  mga kadugo nga mas  arang-arang  pa kanimo  ang  Muslim  kay  kun makigkamatay  kini  sa  Kristiano, natural lang  kay  di man  kaha  sila kaliwat  sa mga tawong  nagpatawag  og Kristiano, apan ikaw  nga  mounay ra og patay sa imong  kadugo, tungod  lang sa kawsa  nga hanap, maayo  kaha  ang imong  dungog niana?