EDITORYAL - Katoliko miawhag og panaghiusa

Gibati  og  kaikag  ang  mga  lider  sa simbahang  Katoliko  dinhi  sa Sugbo  pag-awhag  sa  mga miyembro  niini  nga  maghiusa  pagbotar  sa  mga  kandidato  nga  ilang  pilion  karong  Mayo 13  nga  piniliay.

Ang  tinuod  kun magkasabot  ang  tanang  miyembro  sa Katoliko  nga maghiusa  sa  ituboy  nga  kandidato  sa mga  lider  niini,  hayahay  gyud  kaayo  ang  hingtungdang  politiko.

Kay   gawas  sa Katoliko, ang  ubang  mga  organisasyong  sibika ug relihiyuso  kansang   usa  sa criteria   sa  sayantipikanhong  pagpili  og  kandidato  mao  ang  winnability  niini, mahidugang  man  sa pulso  sa  mga miyembro  sa Katoliko  busa  maglawig  sa kadaugan  ang  kandidato  nga  hiusahan  sa  maong  mga  pundok.

Apan  di  baya  sayon  ang  panaghiusa , ilabi  na  kun  ang  lider  sa grupo  huyang  ug  way  hustong  sukaranan  nganong  angay  makighiusa  kaniya  ang  iyang  mga  miyembro.

Kini  tungod  kay  ania  kita  sa nasud nga  demokratikanhon  ang  balaod, diin  ang  matag  usa ka  lungsoranon  gawasnon  sa pagpadayag  sa  iyang  hunahuna, pagpamulong,  sa paghukom  ug  uban  pa.

Apan  angay  timan-an  sa tanan  nga  luyo  sa atong  kagawasnon, may balaod  nga  nagkontrolar   ug  mao  kini  ang balaod  nga  iya sa  Dios  nga  nagbuhat  sa tanang  mga  butang.

Ang  panaghiusa  usa  ka  sugo  sa Dios  nga  nahisulat  sa  Biblia  nga  di  tungod  kay  may  kagawasan  ang  tawo  sa pagpakanaog  sa  iyang  desisyon  ilabi  na  sa pagboto, pasagdan  lang  siya sa Dios  sa iyang  gusto.

Estrikto  ang  Dios  sa mga  tawong  nag-alagad  Kaniya  pagpatuman  sa Iyang  gusto  bisan  ang  balaod  sa yuta  naghatag  kagawasan  sa tawo  sa paghimo  sa gusto  niyang  buhaton  lakip ang  pagpili  og  gusto  niyang  kandidato  nga  botohan  sa adlaw  sa piniliay.

Mao  nga  sa  wa mag-alagad  sa tinuod  nga Dios, lisud  matuman  ang  panaghiusa.

Lahi  sa  mga  tawong  gisugo  sa  Dios  sa pagtuman  sa  panaghiusa  kay  gaan  ug  malipayon  silang  motuman  niini  kay  mao  kini  ang  kalipay  sa Dios  nga  naghatag  kanila og  kinabuhi,  nga ilang  girespeto pag-ayo   kay  maoy    nagtawag  kanila  aron  mahimong  sakop  sa pundok  nga  giila  sa Dios  nga  Iyang  mga anak  babaye  ug lalaki  ning  katapusang  mga  adlaw.